Metfjöldi sparnaðarráða til nýrrar ríkis­stjórnar

 Nýr forsætisráðherra hóf árið af krafti og kallaði eftir sparnaðarráðum í rekstri ríkisins í Samráðsgátt stjórnvalda í dag.  Fólki var ráðlagt að velta fyrir sér hvort opinberu fé væri eytt í sömu verkefni ef verið væri að byrja hér frá grunni. Fram kom að áætluð ríkisútgjöld séu 16 milljónir á hverja fjögurra manna fjölskyldu alls um 1.550 milljarðar króna.

Sparnaðarráðin hrúgast inn

Meðal á þriðja hundrað tillagana sem hrúguðust inn í Samráðsgátt stjórnvalda í  dag er að leggja niður ráðherrabíla. Ganga úr Nató og hætta að veita fjármunum í vopnakaup og stríðsrekstur. Fækka eða sameina sendiráð og stofnunum og fækka aðstoðarmönnum ráðherra. Flestir velja þó að birta ekki tillögur sínar. 

Kristrún Frostadóttir forsætisráðherra er vongóð um að margar gagnlegar tillögur berist.

„Ég hef mjög góða reynslu af samráði við almenning. Bæði í opnu fundarformi og í beinum tilmælum. Almenna þekkingin reynist gjarnan vel. Ef sömu tillögurnar koma aftur og aftur upp þá er einfaldlega eitthvað til í þeim,“ segir Kristrún.

Sameining eigi ekki að skerða þjónustu

Kristrún segir þetta skref í samræmi við stefnuyfirlýsingu ríkisstjórnarinnar um að hagræða og sameina stofnanir. Það þurfi þó ekki að þýða uppsagnir.

„Ef stofnanir eiga að sameinast þá þarf að vera augljóst að það muni ekki hafa í för með sér að þjónusta verði skert,“ segir hún. 

Aðspurð um hvað ríkisstjórnin hyggst spara í hagræðingaraðgerðum svarar Kristrún: 

„Það á allt eftir að koma í ljós. Við getum ekki gefið okkur eina fasta tölu fyrir fram því við verðum að geta staðið undir þjónustu. Við viljum að velferðarþjónustan í landinu sé vel fjármögnuð og þjónusta á landsbyggðinni sé tryggð.“.

Nota gervigreind

Hægt er að senda inn tillögur í Samráðsgátt stjórnvalda um hagræðingu í ríkisrekstri til 23. janúar og eftir það tekur þriggja manna starfshópur við þeim. 

„Við verðum líka auðvitað með starfsfólk hér í forsætisráðuneytinu og fjármálaráðuneytinu sem munu vinna úr þessu. Við ætlum líka að nota gervigreind í þessari vinnu. Það mun taka einhvern tíma. Þá munu við líka  fá ráðgjöf frá sérfræðingum um hvar og hvernig er hægt að hagræða,“ segir Kristrún. 

Ætla að hrista hópinn saman á Þingvöllum

Ríkisstjórnin hittist á vinnufundi í fyrramálið í forsetaráðherrabústaðnum á Þingvöllum.

„Við munum halda áfram að ræða um stjórnarsáttmálann. Við fórum hratt yfir hann á fyrsta formlega ríkisstjórnarfundinum í síðustu viku. Við munum fara yfir forgangsmál ríkisstjórnarinnar og hagræðingarverkefnið. Fjármálaráðherra og fjármálaráðuneytið eru að fara af stað með undirbúning fjármálaáætlunar og við ætlum að ræða það.  Þetta í raun enn þá betri leið til að hrista hópinn enn þá betur saman svo við getum verið samstíga á komandi mánuðum,“ segir hún.

Kristrún er búin að ákveða hvern hún vill fá sem næsta þingflokksformann Samfylkingar.

„Ég á eftir að kynna þessa tillögu fyrir þingflokknum og við verðum mjög líklega með þingflokksfund  strax eftir helgi. Það þarf líka að kjósa í stjórn þingflokksins, ritara og varamann. Þetta er eitthvað sem þingflokkurinn ræðir um og greiðir svo atkvæði í kjölfarið,“ segir Kristrún.

Aðspurð um hvort Dagur B. Eggertsson hafi lýst yfir áhuga á að gegna stöðu þingflokksformanns svarar Kristrún: 

Það er fullt af góðu fólki í þingflokki Samfylkingar sem hefur áhuga á að gegna ábyrgðarstöðum.