Ari nýr tækni­stjóri

Í fréttatilkynningu þess efnis segir að að markmiðið með stöðu tæknistjóra og tæknisviðs sé að skerpa á tæknistefnu, auka skilvirkni í hugbúnaðarþróun og að hámarka gæði og áreiðanleika kerfa sem Tern Systems afhendir til sinna viðskiptavina. 

Þakklátur fyrir traustið

Með því að sameina teymin sem vinna að viðhaldi og þróun tækniinnviða gefist tækifæri til að skapa framúrskarandi umhverfi fyrir þróun á hugbúnaðarkerfum fyrir iðnað, sem lúti ströngum gæðakröfum frá opinberum eftirlitsstofnunum.

„Ég er þakklátur fyrir það traust sem mér er sýnt með þessari ráðningu og spenntur að takast á við nýjar tæknilegar áskoranir í þróun kerfa fyrir stjórnun flugumferðar. Við lifum á tímum mikilla breytinga og í þeim felast afar spennandi tækifæri fyrir okkur hjá Tern Systems,“ er haft eftir Ara.

Hefur unnið lengi hjá félaginu

Ari hafi unnið hjá Tern Systems í rúm þrettán ár og gegnt ýmsum tæknilegum störfum sem tengjast þróun lausna fyrir flugumferðarstjórn og þekki því starfsemi fyrirtækisins betur en flestir. Ari hafi numið tölvunarfræði og vitsmunavísindi við háskólann í Skövde og hafið starfsferilinn í hugbúnaðarþróun þar sem hann hafi unnið við þróun á radar- og fluggagnakerfum. Á síðustu árum hafi Ari starfað sem tæknilegur vörustjóri og í því hlutverki hafi hann haft yfirumsjón með vöruarkitektúr og tæknilegri stefnu innan Tern Systems.

„Ég hef fylgst með störfum Ara lengi og fagna því mjög að fá hann í þetta nýja hlutverk hjá Tern Systems. Ari býr yfir yfirgripsmikilli þekkingu á okkar starfsemi og þeim vörum sem Tern hefur þróað. Þessi ráðning undirstrikar metnað okkar til þess að uppfylla þær ströngu kröfur um gæði og öryggi sem krafist er i flugiðnaðinum,“ er haft eftir Magnúsi Þórðarsyni, framkvæmdastjóra Tern Systems.

Tern Systems hafi í um þrjátíu ár þróað hugbúnaðarlausnir fyrir stjórn flugumferðar en lausnir þróaðar af Tern Systems séu nú í notkun víða í Evrópu, Asíu, Eyjaálfu og Afríku. Hugbúnaðarlausnir Tern Systems byggi á löngu samstarfi við Isavia ANS, sem sjái um stjórnun flugumferðar yfir Norður-Atlantshafið en svæðið sé eitt það víðfeðmasta og umferðamesta í heiminum í dag. 

Hjá Tern Systems starfi yfir áttatíu manns en fyrirtækið sé með höfuðstöðvar á Íslandi og skrifstofur í Ungverjalandi og Póllandi