Eyrir skuld­laus og með 62 milljarða hlut í JBT Marel

Í fréttatilkynningu þess efnis frá Eyri segir að félagið standi á tímamótum og skuldleysið undirstriki styrk félagsins á þeim tímamótum.

Samruni Marel og JBT, sem studdur hafi verið af Eyri Invest, leggi traustan grunn að framtíðarvexti sameinaðs félags. JBT Marel sé leiðandi alþjóðlegur framleiðandi á búnaði, samþættri tækni og þjónustu fyrir matvæla- og drykkjarvöruiðnaðinn. Markmið félagsins sé að umbreyta framtíð matvælaframleiðslu. 

Starfsmenn um tólf þúsund

Tekjur JBT Marel síðustu tólf mánuði hafi numið um 3,5 milljörðum bandaríkjadala og starfsmenn séu um tólf þúsund í yfir þrjátíu löndum. Hlutabréf félagsins séu skráð í kauphöllinni í New York og tvískráð hér á landi.

„Þetta eru spennandi tímamót fyrir Eyri Invest, Marel og JBT. Við erum stolt af því að hafa tekið þátt í þessari einstöku vegferð sem hefur skilað þessari farsælu niðurstöðu og við hlökkum til að fylgjast með framtíð þessa öfluga félags,“ er haft eftir Friðriki Jóhannssyni, stjórnarformanni Eyris Invest.

Meginþorri eigna bundinn í JBT Marel

Þá segir í tilkynningu að Eyrir Invest hafi verið kjölfestufjárfestir í Marel frá árinu 2005 og hafi með aðkomu sinni átt stóran þátt í vexti og þróun félagsins. Á síðustu tveimur áratugum hafu tekjur Marels aukist úr 129 milljónum evra í yfir 1.700 milljónir evra og starfsmannafjöldi aukist úr 800 í yfir 7.000 starfsmenn í yfir þrjátíu löndum. Á sama tímabili hafi Marel skilað ávöxtun til hluthafa sem hafi verið sambærileg við bestu hlutabréfavísitölur í Bandaríkjunum og Evrópu. Samruni Marel og JBT sé í samræmi við langtímasýn Eyris Invest fyrir vöxt og viðgang Marel.

Hluthafahópur Eyris Invest samanstandi af fjársterkum einstaklingum og stofnanafjárfestum sem hafi stutt félagið dyggilega í gegnum tíðina. Til að tryggja áframhaldandi gagnsæi og samráð við hluthafa muni Eyrir Invest halda hluthafafund í febrúar. 

Á fundinum verði farið yfir stöðu félagsins og tillögur stjórnar um framhaldið kynntar. Um níutíu prósent af eignum félagsins séu hlutabréf í JBT Marel.

Markaðsvirði sameinaðs félags JBT og Marel er þegar þessi frétt er skrifuð um það bil 940 milljarðar króna. 6,6 prósenta hlutur Eyris er því um 62 milljarða króna virði.

Feðgarnir stærstu eigendurnir

Stærstu eigendur félagsins eru feðgarnir Þórður Magnússon og Árni Oddur Þórðarson og tengdir fjárfestar. Þeir fara samanlagt með 39 prósenta hlut í félaginu.

Árni Oddur var stjórnarformaður Marel í átta ár áður en hann varð forstjóri en því starfi sinnti hann í tíu ár. Þórður var um árabil stjórnarformaður Eyris en þeir feðgar stofnuðu félagið fyrir rúmum tveimur áratugum.