„Ég vil að þú sért alltaf með farða, annars sjást bólurnar þínar“

Sjúk ást, fræðslu- og forvarnaverkefni fyrir ungt fólk gegn kynferðisofbeldi á vegum Stígamóta, skoðar í ár heilbrigð og óheilbrigð sambönd í gegnum nýtt umræðuspil, Sjúk flögg. Spilið inniheldur yfir 190 fullyrðingar sem eru ýmist rautt flagg, grænt flagg, bæði eða hvorugt – allt eftir samhenginu.

Fullyrðingarnar eru byggðar á gögnum Sjúktspjall, sem er nafnlaust netspjall fyrir ungt fólk, sem og á reynslu ráðgjafa á Stígamótum. Tilgangurinn er að fá ungt fólk til að velta fyrir sér eigin hegðun og hegðun annarra og um leið skerpa á heilbrigðum viðmiðum þegar kemur að samskiptum, mörkum og samböndum.

Myndbönd með Ólafi Jóhanni, Sigurlaugu Birnu, Katrínu Myrru, Dj Guggu, Tommaspoons, Alexander Óla, May Sigurjóns, Eriku Nótt og Guðjóni Smára verða birt í vikunni og á næstu mánuðum á samfélagsmiðlum Sjúkást þar sem þau spila Sjúk flögg og ræða sambönd og samskipti. 

Fyrstu myndböndin má sjá að neðan. 

Spilið, veggspjöld Sjúkást 2025 og fræðsluefni má finna á www.sjukast.is, en eins og undanfarin ár hafa Stígamót dreift veggspjöldum og fræðsluefni til félagsmiðstöðva og framhaldsskóla. 

„Að þessu sinni var spilið Sjúk flögg einnig sent og hefur fengið mjög góðar undirtektir! Ungt fólk hefur rætt opinskátt um mörk og samskipti, en spilið er mjög góð kveikja í slíkar umræður,“ segir í tilkynningu Stígamóta.

Sjúk ást er fræðslu- og forvarnaverkefni fyrir ungt fólk gegn kynferðisofbeldi á vegum Stígamóta. Markmið verkefnisins er að fræða ungmenni um mörk, samþykki og heilbrigð sambönd með það að leiðarljósi að koma í veg fyrir kynferðisofbeldi áður en það er framið.

Sjúktspjall er nafnlaust netspjall fyrir ungmenni 25 ára og yngri þar sem þau geta leitað ráðgjafar fagaðila um sambönd, samskipti og ofbeldi. Spjallið opnaði í mars 2022, en árið 2024 voru meira en 230 spjöll þar sem helstu þemu voru kynferðisofbeldi, meðvirkni og óöryggi og óheilbrigð sambönd. Sjúktspjall er opið þrjú kvöld í viku frá kl. 20-22 og má finna á síðunni www.sjukast.is.