Innlent

Kvikugangur talinn ná lang­leiðina að flugvallarstæði Hvassahrauns

Kristján Már Unnarsson skrifar
Kvikugangurinn sem myndaðist í gær nær langleiðina að flugvallarstæði í Hvassahrauni, miðað við þá mynd sem skjálftavirknin teiknar upp. Minni ferningurinn táknar 3x3 kílómetra svæði sem Hvassahraunsnefndin markaði undir innanlandsflugvöll en sá stærri 5x5 kílómetra svæði fyrir millilandaflugvöll.
Kvikugangurinn sem myndaðist í gær nær langleiðina að flugvallarstæði í Hvassahrauni, miðað við þá mynd sem skjálftavirknin teiknar upp. Minni ferningurinn táknar 3x3 kílómetra svæði sem Hvassahraunsnefndin markaði undir innanlandsflugvöll en sá stærri 5x5 kílómetra svæði fyrir millilandaflugvöll. Grafík/Sara Rut Fannarsdóttir

Vísindamenn Veðurstofunnar áætla að kvikugangurinn sem myndaðist í gær sé hátt í tuttugu kílómetra langur. Þeir telja enn möguleika á nýju gosi á norðausturhluta kvikugangsins en taka þó fram að það sé að verða ólíklegra með tímanum.

Í fréttum Stöðvar 2 mátti sjá hvernig mynd af skjálftavirkni frá því í gærmorgun teiknar að mati vísindamanna Veðurstofunnar legu kvikugangsins, sem þeir segja að sé sá stærsti til þessa frá því umbrotin hófust. Eldgosið í gær kom upp rétt við Grindavík en kvikugangurinn virðist hafa náð langleiðina í átt að Kúagerði.

Hraun frá Sundhnúksgígaröðinni náði að renna sex kílómetra leið þegar það fór yfir Nesveg vestan Grindavíkur.Vilhelm Gunnarsson

Fjarlægðin frá kvikuganginum að Reykjanesbraut er um þrír kílómetrar. Fjarlægðin frá kvikuganginum í átt að Vogum er um sex kílómetrar. Það er ekki mikið þegar haft er í huga að lengstu hrauntaumarnir, sem eldgosin við Sundhnúka sendu frá sér á síðasta ári, náðu að renna sex kílómetra vegalengd vestur fyrir Grindavík á fáum klukkustundum og fjóra til fimm kílómetra til Bláa lónsins.

Veðurstofan telur kvikuganginn um tuttugu kílómetra langan.Grafík/Sara Rut Fannarsdóttir

Ef eldgos kæmi upp á norðausturhluta kvikugangsins verður þannig að telja verulega hættu á að hraun gæti bæði tekið Suðurnesjalínu í sundur og einnig Reykjanesbraut. Þá er það áleitin spurning hvort byggð í Vogum gæti verið ógnað.

Séð yfir Voga á Vatnsleysuströnd.Vísir/Egill

Það er einnig umhugsunarvert að það eru aðeins sex mánuðir frá því Svandís Svavarsdóttir, þáverandi innviðaráðherra, og Einar Þorsteinsson, þáverandi borgarstjóri, kynntu skýrslu starfshóps um flugvöll í Hvassahrauni. Þar var staðsetning hans sýnd annarsvegar fyrir innanlandsflugvöll og hins vegar fyrir stóran millilandaflugvöll.

Skýrsluhöfundar komust að þeirri niðurstöðu að hætta vegna hraunflæðis væri afar lítil. Ráðherrann Svandís og borgarstjórinn Einar voru bæði á því að það ætti að setja meiri fjármuni í að rannsaka flugvöll í Hvassahrauni. Núna sýnir mynd Veðurstofunnar kvikugang sem er innan við þrjá kílómetra frá flugvallarstæðinu.

Hér má sjá frétt Stöðvar 2:

Fréttir af flugi Eldgos á Reykjanesskaga Eldgos og jarðhræringar Vogar Borgarstjórn Reykjavíkurflugvöllur

Tengdar fréttir

Flugvöllur í Hvassahrauni alls ekki úr myndinni

Niðurstöður starfshóps um byggingu flugvallar í Hvassahrauni eru þær helstar að ólíklegt sé að náttúruvá hafi áhrif á flugvöll á svæðinu, engin veðurskilyrði mæli gegn valinu og líklega verði ekki mikil langtímaáhrif á eftirspurn í innanlandsflugi ef af flutningi þess verður í Hvassahraun.

Segja of snemmt að útiloka byggingu flugvallar í Hvassahrauni

Dagur B. Eggertsson borgarstjóri og Einar Þorsteinsson, formaður borgarráðs, segja báðir rétt að bíða eftir niðurstöðum áhættumats Veðurstofu Íslands vegna flugvallar í Hvassahrauni; of snemmt sé að útiloka þann möguleika.

Mest lesið


Fleiri fréttir

Sjá meira


×

Mest lesið