Fjöl­miðla­nefnd tekur fyrir um­fjöllun Fréttarinnar

Þetta kemur í svari frá Fjölmiðlanefnd við fyrirspurn fréttastofu. 

Umræða um kynferðisofbeldi og sér í lagi hópnauðganir hefur verið hávær í samfélaginu undanfarna daga. Um miðjan apríl greindi Vísir frá því að sex hópnauðganir hefðu komið inn á borð lögreglu það sem af er ári.

Um liðna helgi varð svo hávær umræða á samfélagsmiðlum þegar vefmiðillinn Fréttin fullyrti að hælisleitendur væru grunaðir um að hópnauðga sextán ára stúlku í Reykjavík um páskana. Erlendir menn hefðu nálgast stúlkuna á fólksbíl, hrifsað upp í bílinn og frelsissvipt.

„Upptökur af frelsissviptingunni liggja fyrir hjá lögreglu samkvæmt sömu heimildum. Ekið var með stúlkuna á ótilgreindan stað þar sem mennirnir brutu á barninu kynferðislega og skiptust á að nauðga stúlkunni í um þrjár klukkustundir. Eftir að hafa níðst á stúlkunni klukkutímum saman, var ekið með hana í íbúð í Vesturbænum, þar sem fleiri menn héldu sig til og brutu þeir allir á henni í sjö klukkustundir til viðbótar. Mennirnir voru níu talsins í heildina,“ segir í umfjöllun Fréttarinnar sem enn er í birtingu.

Þá var haft eftir ónefndum heimildarmanni sem var sagður tengjast stúlkunni fjölskylduböndum að karlmennirnir væru frá Tyrklandi og Palestínu.

Ekkert slíkt mál til rannsóknar

Bylgja Hrönn Baldursdóttir, aðstoðaryfirlögregluþjónn hjá kynferðisbrotadeild Lögreglunnar á höfuðborgarsvæðinu, sagði í samtali við Vísi á mánudag að ekkert mál væri til rannsóknar hjá embættinu sem geti passað við lýsingar á ætlaðri hópnauðgun um páskana. Engin tilkynning hefði borist um slíkt brot.

Mar­grét Frið­riks­dótt­ir, rit­stjóri Frétt­in.is, sagðist í samtali við Heimildina á mánudag standa við frétt sína „þangað til hið sanna kemur í ljós“. Hún viðurkenndi um leið að grunnurinn að greininni væri Facebook-færsla sem kona hefði birt og hún metið trúverðugan í ljósi fyrri umfjöllunar um hópnauðganir. 

Bylgja Hrönn hefur einnig staðfest við Fréttina að ekkert mál í líkingu við það sem vefurinn fjallaði um sé á borði lögreglu.

Fréttin.is er skráður fjölmiðill hjá Fjölmiðlanefnd og á vef Fjölmiðlanefndar má finna ritstjórnarstefnu miðilisins.

„Tjáningarfrelsið er hornsteinn lýðræðislegs samfélags og er miðillinn stofnaður með það að leiðarljósi að opna umræðuna í íslensku samfélagi sem við teljum vera einsleita og jafnvel byggða á þöggun og ritskoðun sem er andstætt lýðræðinu. Við einbeitum okkur að því að birta fréttir byggðar á trúverðugum heimildum sem aðrir miðlar treysta sér ekki til að fjalla um.“

Margrét ítrekaði síðast í gær í Facebook-hópnum Stjórnmálaspjallið að Fréttin hefði fengið staðfestingu á málinu frá fyrstu hendi og verið væri að vinna að því vandlega. Þá sagði Þröstur Jónsson, bæjarfulltrúi Miðflokksins, í athugasemd við færslu Margrétar að allt sem hún segði væri satt og rétt. Hann væri bundinn trúnaði yfir vitneskju sinni. 

Þröstur hefur reglulega ratað í fréttirnar meðal annars þegar hann sagði bænahring í Reykjavík að þakka að ekki hefðu orðið mannfall við aurskriður á Seyðisfirði.