Ætlar að eyða mun minna í pólitíkina

Auðjöfurinn varði fúlgum fjár í að styðja Trump í forsetakosningunum vestanhafs í fyrra. Samkvæmt frétt Reuters er talið að hann hafi verið nærri því þrjú hundruð milljónum dala í stuðning við Trump og aðra Repúblikana á síðasta ári.

Þetta sagði Musk á ráðstefnum í Katar í dag og sagðist hann þeirrar skoðunar að hann væri búinn að gefa nóg til stjórnmálanna.

„Varðandi pólitísk fjárútlát, ætla ég að draga verulega úr þeim í framtíðinni,“ sagði Musk. „Ég held ég sé búinn að gera nóg.“

Samkvæmt Wall Street Journal gaf Musk þó til kynna að honum gæti snúist hugur, ef aðstæður breyttust og sjái hann tilefni til. Núna sjái hann ekki ástæðu til mikilla fjárútláta.

Hann hét því einnig að vera áfram forstjóri hjá Tesla í að minnsta kosti fimm ár, nema hann deyi, eins og hann orðaði það.

Í apríl lýsti Musk því yfir að hann ætlaði að draga úr störfum sínum fyrir Trump og einbeita sér að rekstri bílafyrirtækisins en það var eftir að fyrirtækið birti ársfjórðungsuppgjör sem þótti mjög slæmt fyrir Tesla.

Störf Musks varðandi umfangsmikla niðurskurði í stjórnsýslu Bandaríkjanna og aðrar aðgerðir hans varðandi stjórnmál þar í landi hafa leitt til mótmæla gegn honum og Tesla. Í uppgjörinu kom fram að pólitískt andrúmsloft hafi haft mikil áhrif á reksturinn.

Mikil eftirspurn, nema í Evrópu

Musk sagði þó í dag að fyrirtækið hefði mögulega tapað einhverjum frjálslyndum viðskiptavinum en aðrir hefðu komið í staðinn. Sölutölur væru þegar komnar í fyrra horfa. Hann sagði eftirspurn eftir bílum Tesla vara mikla allss taðar, nema í Evrópu.

Wall Street Journal sagði nýverið frá því að stjórnarmeðlimir Tesla hafi að undanförnu leitað til fyrirtækja sem sérhæfa sig í ráðningum stjórnenda varðandi leit að nýjum forstjóra. Stjórnin er sögðu hafa gert Musk ljóst að hann væri búinn að leggja allt of mikla áherslu á störf sín fyrir Trump og þyrfti frekar einbeita sér að rekstri Tesla.

Talsmenn fyrirtækisins neituðu þessum fregnum og Musk gagnrýndi fréttaflutninginn á samfélagsmiðli sínum.