Frábiður sér að nör­dum sé líkt við Sósíal­ista

Kristján er heldur ósáttur við þá líkingu sem Guðmundur Hrafn, formaður leigjendasamtakanna, grípur til þegar hann segir nýafstaðinn og sögulegan aðalfund Sósíalistaflokksins eins og Warhammer-útsölu í afþreyingarversluninni Nexus.

Viðtalið hefur vakið mikla athygli og kallað fram viðbrögð. Þannig hefur Sólveig Anna Jónsdóttir formaður Eflingar séð ástæðu til að svara og nú er það Warhammer-samfélagið sem vill gera athugasemd við líkingarmál Guðmundar Hrafns.

Kristján segist oft spurður hvað þurfi til að verða góður Warhammerspilari og ráðleggingar hans eru þær að fólk hafi gott hugarfar, sýni hæfni í mannlegum samskiptum og svo hjálpi óneitanlega að vera heppinn.

„Warhammer snýst um að hittast, spila & spjalla, og hafa gaman saman. Það sýnir sig greinilega að það hefur vantað í Sósíalistaflokkinn og félagsmenn þess,“ segir Kristján.

Honum finnst illa vegið að Warhammer-spilurum að líkja þessu tvennu saman.

„Enn og aftur er vinstri vængur íslenskra stjórnmála að springa eins og fyrrum Júgóslavía og bitrir kverúlantar leitast við að komast á forsíðu blaðanna og keppast um leiðindi við landsmenn.“

Kristján óskar sósíalistum alls góðs en vildi gjarnan óska þess að það fólk sleppi því að blanda tölvunördum saman við misskemmtilegar deilur í flokki sínum.