Notkun rafbyssa í sam­ræmi við mark­mið

Lögreglumenn vopnuðust rafbyssum í fyrsta sinn í september síðastliðnum. Ríkislögreglustjóri hefur nú birt ársfjórðungsskýrslu yfir notkun vopnanna en þar kemur fram að lögreglumenn hafi beitt rafbyssum þrisvar sinnum við handtöku á fyrsta ársfjórðungi þessa árs og dregið hana úr slíðri 28 sinnum við handtöku. Um er að ræða tvöföldun á beitingu rafbyssa á milli ársfjórðunga en byssurnar voru einungis þrettán sinnum teknar upp við handtöku á síðasta ársfjórðungi síðasta árs og tvisvar beitt. 

Birna Blöndal lögreglufulltrúi hjá Mennta- og starfsþróunarsetri lögreglu segir aukninguna ekki áhyggjuefni.

„Það sem við þurfum að hafa í huga er að lögreglu ber hverju sinni að velja vægasta úrræði sem völ er á og við verðum að taka mið af aðstæðum á vettvangi þegar við erum að velja hvaða valdbeitingu við ætlum að beita og ef við horfum á þessar tölur þannig, sú staðreynd að það sé verið að draga tazer oftar úr slíðri er ekki endilega að sýna að lögregla sé að beita meira valdi, lögregla er að kjósa að velja þetta tæki og nota það til að leysa málin í staðinn fyrir að fara inn í handtöku, setja hendur á fólk eða beita kylfu eða varnarúðanum þannig að í rauninni í þessum samanburði er þetta vægara úrræði heldur en að nálgast einstaklinginn og beita kylfu eða varnarúða.“

Ekki sé um að ræða aukningu á grófari valdbeitingu. Notkunin sé í samræmi við þau markmið sem lögregla hafi lagt upp með í byrjun þegar byssurnar voru teknar í notkun.

„Þetta er í rauninni svoldið svona það sem við lögðum upp með þegar við fórum af stað með þetta rafvarnarvopnaverkefni að við vorum að horfa á tölur frá Bretlandi þar sem tölfræðin frá þeim var að sýna að í allt að 90 prósent tilfella þá væri nóg að kynna tazerinn til leiks.“