Ríkið greiddi 25 milljarða í laun

Þetta segir í tilkynningu á vef Fjársýslu ríkisins, sem greiðir út laun allra ríkisstarfsmanna. Þar segir að fjöldi launaseðla þennan mánuð hafi verið 30.435 og alls hafi 27.960 ríkisstarfsmenn fengið greidd laun.

Útborguð laun ríkisstarfamanna hafi numið um 15.4 milljörðum og mánaðarlaun hafi verið um 70 prósent launa, en auk mánaðarlauna séu hinar ýmsu launategundir greiddar sérstaklega fyrir þá ríkisstarfsmenn sem vinna vaktavinnu. Um mánaðarmótin hafi orlofsuppbót verið greidd til ríkisstarfsmanna og fjárhæð hennar þetta árið hafi verið um 1,1 milljarður.

Fyrir maímánuð hafi launatengd gjöld verið um fimm milljarðar, eða um 20 prósent af heildarlaunakostnaði ríkisins. Launatengd gjöld séu framlag ríkisins í lífeyris- og séreignasjóði, greiðslur í sjóði stéttarfélaga samkvæmt ákvæðum kjarasamninga og tryggingagjald.