Telja Ísraels­her hafa um­kringt bát Thunberg

Varnarmálaráðherra Ísraels skipaði ísraelska hernum fyrr í dag að koma í veg fyrir að hópurinn kæmist að ströndum Gasastrandarinnar. Rétt fyrir klukkan ellefu á íslenskum tíma birti Thiago Ávila, einn aðgerðarsinnanna, myndskeið á Instagram þar sem þau sögðu báta Ísraelshers umkringja bátinn þeirra Madleen.

„Ísraelski herinn er hérna núna, hringið öllum bjöllum. Við erum umkringd af bátunum þeirra. Já þetta er hindrun, það er verið að fremja stríðsglæp akkúrat núna. Gerið það, hringið öllum viðvörunarbjöllum,“ sagði Thiago Ávila í myndskeiði á Instagram-síðu sinni. Hann er einn af tólf aðgerðarsinnum í bátnum.

Í myndbandinu heyrist hvernig viðvörunarbjöllur ómuðu en í myndbandi birt nokkrum mínútum síðar segir Ávila alla bátana hafa horfið.

„Við erum í Miðjarðarhafinu þar sem við kveiktum á viðvörunarbjöllum því það komu mjög margir bátar að okkur í einu og umkringdu bátinn. Síðan hurfu þeir. Þetta getur verið hernaðaráætlun að koma aftan að okkur með ljósin slökkt,“ segir hann í seinna myndbandinu.

Allir skipverjar höfðu farið í björgunarvesti og kveikt á viðvörunarbjöllunum. Þau virðast viss um að fulltrúar Ísraels muni láta sjá sig fyrr en síðar.

„Þegar þeir koma svo í raun um borð í bátinn munu þeir koma í veg fyrir að við getum átt í samskiptum við umheiminn. Núna er tíminn til að deila öllum upplýsingum sem við höfum. Við vitum ekki enn hvort þetta sé árás, hvort þeir séu að koma til að drepa okkur eða stöðva okkur eða ræna fólki,“ segir hann.

„Við reynum að halda ykkur upplýstum en líklegast er að þegar þeir koma munum við ekki geta átt í samskiptum við umheiminn.“

Uppfært 23:40: Drónar Ísraelshers eru fyrir ofan bátinn samkvæmt nýju myndskeiði Ávila. Hann heyrist biðja skipverja um að fela sig þar sem um er að ræða sömu dróna og skutu á bát ferðalanga í sömu erindagjörðum fyrir um mánuði síðan. 

Francesca Albanese, sérstakur sendifulltrúi Sameinuðu þjóðanna í málefnum Palestínu, segir frá samskiptum sínum við hópinn á samfélagsmiðlinum X. Hún segir tvo dróna fljúga yfir bátnum.

„Það er verið að ráðast á okkur,“ segir Ávila í öðru myndskeiði.

Uppfært 23:46: Í nýjasta myndskeiði Ávila segir hann Ísraelsher koma í veg fyrir að skipverjarnir nái talstöðvarsambandi. Ónefndur einstaklingur heyrist tala stöðugt á talstöðvarrásinni svo ekki sé hægt að nota hana.

Uppfært 00:03: „Við erum ekki hætt, við erum ennþá á leiðinni til Gasa, við erum ekki hrædd,“ segir Ávila í nýju myndskeiði. Hann sýnir einnig drónana út um gluggann sem eru einungis nokkrum metrum frá bátnum. Þrátt fyrir það segir hann alla skipverja vera í góðu lagi en þau ætli að halda sig innandyra í bili.

Í annarri færslu segir hann drónana sprauta einhverju hvítu efni á bátinn. Óvíst er um hvernig efni er að ræða.

Uppfært 00:11: Hraðbátar Ísraelshers eru komnir að Madleen samkvæmt Albanese og enginn særður. Hún heyrði skipstjóra bátsins ræða við hermenn Ísralehers og heyrði hann segja að annar hraðbátur væri að nálgast áður en hún missti samband við skipverjana.

Hægt er að fylgjast með ferðalaginu í rauntíma hér.