Um­fangs­mikil lögregluaðgerð víða um landið

Í aðgerðunum var lögreglan á Norðurlandi eystra í samstarfi við lögregluna á Vesturlandi, lögregluna á höfuðborgarsvæðinu og sérsveit Ríkislögreglustjóra.

Lögreglan á Norðurlandi eystra greinir frá því á Facebook að um kl. 10 í gærmorgun, 18. júní, hafi lögreglan ráðist í samræmdar lögregluaðgerðir á nokkrum stöðum á landinu þar sem húsleitir hafi verið framkvæmdar að undangengnum úrskurðum frá Héraðsdómi Norðurlands eystra.

„Lögreglan á Norðurlandi eystra hefur um nokkurt skeið unnið að rannsókn á skipulagðri brotastarfsemi sem talin er tengjast fíkniefnaframleiðslu,“ segir í Facebook-færslunni. 

„Með aðgerðunum í gær var unnt að staðfesta þessar grunsemdir og er rannsókn á frumstigi. Farið verður fram á gæsluvarðhald yfir sakborningum í dag. Málið er enn á viðkvæmu stigi og ekki er unnt að veita frekari upplýsingar að svo stöddu.“

Nútíminn greindi frá því í gær að umfangsmikil lögregluaðgerð hefði staðið yfir á Raufarhöfn frá morgni til kvölds. Haft er eftir vitnum að sérsveitin hafi farið inn í hús og brotið sér leið inn.