For­stjóri Flügger á­kærður fyrir brot á við­skipta­þvingunum

Forstjóri og fjármálastjóri dönsku málningarsamsteypunnar Flügger hafa verið ákærðir fyrir aðild að brotum á viðskiptaþvingunum gegn Rússlandi. Gerð var húsleit á heimilum þeirra sem og á skrifstofum samsteypunnar.

Greint var frá því í gær að tveir hefðu verið handteknir í tengslum við málið sem hefur vakið nokkra eftirtekt í Danmörku síðan danska ríkisútvarpið greindi frá því í gær. Þar að auki hefur samsteypan sjálf verið ákærð.

Látnir lausir eftir yfirheyrslur

Danska rannsóknarstofnunin NSK (National enhed for særlig kriminalitet) sinnir auðgunarglæpum og skipulagðri glæðastarfsemi framkvæmdi húsleitirnar. Samsteypan staðfesti húsleitirnar og handtökurnar en hefur ekki viljað tjá sig frekar og viðskiptastjóri félagsins á Íslandi hefur ekki svarað fyrirspurnum fréttastofu.

Umfjöllun DR hverfðist um það að ljóst væri af samfélagsmiðlum að enn væri hægt að kaupa málningu frá Flugger víða í Rússlandi, þrátt fyrir að fyrirtækip hafi verið háð viðskiptaþvingunum Evrópusambandsins á hendur Rússlandi í næstum þrjú ár.

Síðdegis í gær staðfesti fyrirtækið í yfirlýsingu til dönsku kauphallarinnar að fyrirtækið væri til rannsóknar.

„Við höfum yfirgefið Rússland og stefna okkar er mjög skýr að við viljum ekkert hafa með þann markað að gera. Þetta hefur einnig verið skýrt tilkynnt samstarfsaðilum okkar,“ sagði í yfirlýsingunni.

Heimsótti Rússann árið 2023

Rússneski kaupsýslumaðurinn Aleksej Popov hefur lengi verið dreifingaraðili og forsvarsmaður Fluggermálningar í Rússlandi. Samkvæmt fyrirtækinu var samningi við Popov rift árið 2022 sem skýtur skökku við í ljósi þess að Sune Schnack forstjóri Flugger fór í heimsókn til Popovs í Kasakstan árið 2023 eins og sést á myndbirtingum á samfélagsmiðlareikningi Flugger í Kasakstan.

Popov heldur áfram að gefa sig út fyrir að vera talsmaður Flugger í Rússlandi og myndir sem danska ríkisútvarpið hefur undir höndum sýna fram á að umtalsvert magn af vörum fyrirtækisins eru enn til sölu þvert yfir Rússland. Popov er einnig talsmaður málningarinnar í Eistlandi, Aserbaídsjan, Kirgistan og Kasakstan. Hann er grunaður um að útvega Rússum málningu ólöglega í gegnum tengiliða sína í áðurnefndum löndum.

Danska ríkisútvarpið greinir jafnframt frá því að eftirtektarverð aukning í innflutning Fluggermálningu til Kasakstan varð árið 2023. Raunar var ekki ein einasta málningarfata seld í Kasakstan á árunum 2015 til 2023.

„Það lítur út fyrir að það sé kannski ekki svo mikil starfsemi í Kasakstan. Þetta lítur þó gríðarlega grunsamlega út,“ hefur ríkisútvarpið danska eftir Jakob Tolstrup lektor sem er sérfræðingur í málefnum Rússlands og fyrrum Sovétríkjanna.