Hvalur hf. stefnir ís­lenska ríkinu

Viðskiptablaðið greinir frá því að þetta hafi komið fram í ársreikningi félagsins fyrir rekstrarárið 2024 en fréttastofu hefur ekki tekist að koma höndum á ársreikninginn og Kristján Loftsson hefur ekki látið í sig ná.

Í umfjöllun Viðskiptablaðsins kemur fram að ársreikningur Hvals hf. votti um að félagið hafi verið rekið með 224 milljóna króna tapi á síðasta rekstrarári, sem nær yfir tímabilið 1. október 2023 tuk 30. september 2024. Það er veruleg breyting frá fyrri rekstrarárum en á síðasta ári nam hagnaður félagsins tæplega 3,5 milljörðum.

Í ársreikningnum komi einnig fram að Hvalur hafi áður óskað eftir viðræðum við ríkið um uppgjör fjárbóta en þær ekki leitt til niðurstöðu og ríkið ekki fallist á bótaskyld. Félagið byggi á að ákvörðunin hafi verið andstæð lögum og vísar því til stuðnings til álits umboðsmanns Alþingis, þar sem fram kom að frestun upphafs hvalveiða hafi ekki átt sér nægilega skýra stoð í lögum um hvalveiðar.

Þá segi einnig að tilteknir einstaklingar hyggist höfða mál gagnvart öðrum sem eins er ástatt um til greiðslu á vangoldnum launum vegna hvalavertíðar 2023. Um sé að ræða „prófmál“ og hlutaðeigendur líti svo á að komið hafi verið á bindandi ráðningarsamband og þeir eigi rétt á fullum vertíðarlaunum en því mótmælir Hvalur.

Verði launakröfurnar samþykktar gætu þær numið verulegum fjárhæðum sem yrðu þá mögulega til hækkunar fjárhæðar bótakröfunnar á hendur ríkinu. Enginn sparnaður hafi verið í formi launakostnaðar á meðan bannið var í gildi