„Enginn í heiminum að gera þetta nema hann“

„Einhvern veginn náum við að halda okkur inni í þessu allan tímann og gefa þessu séns en við náum aldrei að komast yfir. Svo að sjálfsögðu eru þeir bara með einn besta leikmann í heimi, sem setur galin skot þrátt fyrir að við spilum mjög góða vörn. Það er lítið að gera í því annað en að klappa og fara í næstu sókn og reyna að svara“ hélt Jón svo áfram.

Jón Axel sá um að dekka einn besta leikmann heims, Luka Doncic, nánast allan leikinn.

„Það var erfitt, skemmtilegt og krefjandi á sama tíma. Ekki oft sem maður fær að dekka svona mann og maður reynir bara að sýna allt sem maður getur. Hann skoraði 26 stig í dag en mér fannst ég samt gera eitthvað vel“ sagði Jón en hann lagði lítið upp úr því að komast inn í hausinn á Doncic.

„Reyndi bara að spila physical og halda mér fyrir framan hann. Sumar hreyfingar, þegar hann er að koma af pick&roll‘inu og fer inn í Tryggva sem er 2,17 og klárar yfir hann. Það er enginn í heiminum að gera þetta nema hann. Það eru svona hlutir sem við verðum að lifa með, hlutir sem hann getur gert en aðrir ekki.“

Ísland átti sinn besta leik hvað þriggja stiga nýtingu varðar, en það dugði skammt gegn Slóvenum sem voru sjóðheitir og hittnir líka.

„Á sama tíma voru þeir líka að hitta drulluvel. Það er erfitt, þegar þú ert að reyna að stoppa Luka og svo gefur hann einhverja galna sendingu sem endar með þriggja stiga skoti. Það breytir litlu að við séum að hitta þegar þeir eru líka að hitta“ sagði Jón Axel að lokum.