Upp­þot í Eyjum: „Í kvöld töpuðu í­þróttirnar“

Pistillinn á Facebook-síðu Harðar hefst á orðunum: Í kvöld töpuðu íþróttirnar. Það á enginn að vilja vinna þegar haft er rangt við. Síðan er atburðarrás kvöldsins rakin.

Þar segir að Harðverjar hafi gert athugasemdir við dómara leiksins og framkvæmdastjóra HSÍ vegna starfsmanna á ritaraborði sem þeim þóttu vera full ungir. Jafnframt segir að enginn fulltrúi Eyjamanna hafi verið mættur á tæknifund klukkutíma fyrir leikinn en skýrsla ÍBV hafi verið tilbúin hálftíma fyrir leikinn.

Það er hins vegar atvik undir lok leiksins sem Ísfirðingar eru ósáttastir við. Harðverjar voru með boltann í stöðunni 34-35 og gátu komist tveimur mörkum yfir. Þjálfari þeirra, Pedro Daniel Dos Santos Nunes, setti leikhlésspjaldið á ritaraborðið.

Leikurinn var hins vegar ekki stöðvaður og nokkrum sekúndum seinna var boltinn dæmdur af Harðverjum, þeim til lítillar ánægju. Atvikið má sjá í myndbandinu hér fyrir neðan.

Pedro mótmælti harðlega og fékk rautt spjald og Harðverjar voru því aðeins þrír eftir í vörninni. Eftir leikhlé nýtti ÍBV sér liðsmuninn og Gabríel Martinez Róbertsson jafnaði í 35-35. 

Hörður fékk tækifæri til að tryggja sér sigurinn, Endijs Kusners fór í gegnum vörn ÍBV en Björn Viðar Björnsson, markvörður Eyjamanna, varði. Boltinn barst svo fram völlinn á Gabríel sem skoraði sigurmark ÍBV, 36-35. Lokamínútur leiksins má sjá í myndbandinu hér fyrir neðan.

Í pistlinum á Facebook-síðu Harðar segir að þjálfari ÍBV, Hilmar Ágúst Björnsson, hafi beðið Pedro afsökunar eftir leikinn, að hafa ekkert sagt þegar Hörður óskaði eftir leikhléinu. Jafnframt segir að dómarar leiksins hafi ekki viljað skoða upptöku af atvikinu. Enginn eftirlitsmaður frá HSÍ var á leiknum eins og Handkastið greindi frá.

Í frétt Handkastsins í gærkvöldi kemur fram að dómarar leiksins, þeir Árni Þór Þorvaldsson og Bogdan Dumitrel Ana Gherman, hafi þurft lögreglufylgd í Herjólf og að Pedro hafi hótað þeim.

Harðverjar segja þetta af og frá. Dómarar leiksins hefðu ekki þurft neina lögreglufylgd og Pedro hafi engum hótað.