Kostaði tvo milljarða að selja Ís­lands­banka

Þetta kemur fram í tilkynningu á vef fjármála- og efnahagsráðuneytisins. Kostnaður ríkisins vegna söluferlisins skiptist í þrennt: umsjónarþóknun, söluþóknun og annan kostnað.

Um útboðið segir að það hafi farið fram í maí síðastliðnum þar sem eftirstandandi 45,2 prósenta eignarhlutur ríkisins hafi verið seldur. Útboðið hafi verið haldið í samræmi við lög þar um með það að markmiði að tryggja gagnsæi, hagkvæmni, hlutlægni og jafnræði í útboðsferlinu.

• „Umsjónarþóknun var 0,75% af heildarvirði útboðs, 679,3 m.kr., og var fest í samning við ráðningu umsjónaraðila í ágúst 2024. Þóknunin skiptist jafnt á milli Barclays, Citigroup Global Markets Europe AG og Kviku.
• Söluþóknun var einnig 0,75% af heildarvirði útboðs, 679,3 m.kr., og rann til allra tíu söluráðgjafa sem ráðnir voru.Upphæð söluþóknunar var ákveðin í 4. gr. laga nr. 80/2024 um ráðstöfun eignarhlutar ríkisins í Íslandsbanka hf.“

Í tilkynningunni segir að í anda jafnræðis og hlutlægni hafi verið ákveðið að byggja söluþóknun á innsendum tilboðum frekar en seldum hlutabréfum, að teknu tilliti til markaðsþreifinga. Skiptingin var eftirfarandi:

Undir annan kostnað fellur svo lögfræðikostnaður, kostnaður við endurskoðendur, fjármálaráðgjöf, ráðgjöf vegna kynningar á útboði, almennur kostnaður við útboðið og útlagður kostnaður söluaðila.

Í ráðningarsamningi við söluaðila var kveðið á um að söluaðilar gætu fengið útlagaðan kostnað greiddann af seljanda. Stærsti liðurinn í útlögðum kostnaði söluaðila snýr að sérhæfðum hugbúnaði fyrir útboð. Kvika lagði út fyrir ýmsum kostnaði sem viðkemur skráningu í kauphöll.

BBA Fjeldco og Milbank þjónustuðu seljanda. Logos og White&Case þjónustuðu umsjónaraðila. Lögfræðikostnaður var eftirfarandi:

Aton veitti seljanda þjónustu vegna kynningarmála. Ratsjá var milliliður á milli auglýsenda og seljanda.

Landsbankinn var fjármálaráðgjafi seljanda.

Fjármálaeftirlit Seðlabankans las yfir útboðsskjöl og Íslandsbanki og seljandi skiptu með sér endurskoðunar-, og lögfræðikostnað sem féll til vegna útboðslýsingar.

Hófst haustið 2024

Um útboðið segir að hafa verði í huga að söluferlið hafi hafist haustið 2024 en var svo aflýst með stuttum fyrirvara. Um það bil helmingur þess sem fellur undir annan kostnað sé tilkomið vegna undirbúnings og aflýsingar það ár.

„Hér fylgir samantekt yfir allar þrjár sölurnar sem ríkið hefur staðið fyrir á hlut sínum í Íslandsbanka. Fyrri tvær sölurnar voru framkvæmdar af Bankasýslu ríkisins (BR) en síðasta salan af fjármála- og efnahagsráðuneytinu. Ef kostnaður sem greiddur var vegna hins aflýsta útboðs árið 2024 er dreginn frá lækkar hlutfall kostnaðar við útboðið 2025 í 1,9%.“