Ein­kunnir Ís­lands: Sverrir bestur í grátlegu tapi

Elías Rafn Ólafsson, markvörður - [7]

Varði dauðafæri í tvígang í síðari hálfleik en fékk á sig mark stuttu síðar. Nokkuð öruggur í sínum aðgerðum og gerði ágætlega.

Guðlaugur Victor Pálsson, hægri bakvörður - [6]

Átti frábæran skalla í síðari hálfleik sem en markvörður Úkraínu varði á marklínu. Ekki besta frammistaða Gulla með liðinu en var fínn í vörninni. Fékk boltann í sig í seinna marki Úkraínu sem endaði í netinu.

Sverrir Ingi Ingason, miðvörður - [8]

Frábær í hjarta varnarinnar eins og venjulega. Hörku duglegur og bjargaði okkur oftar en einu sinni.

Hörður Björgvin Magnússon, miðvörður - [6]

Endurkomu leikur fyrir Hörð sem hefur glímt við erfið meiðsli. Fín frammistaða í varnarlínu Íslands.

Mikael Egill Ellertsson, vinstri bakvörður - [6]

Verður bara betri og betri í þessari vinstri bakvarðarstöðu. Náði að nýta hraða sinn vel til þess að leysa hröð hlaup hjá Úkraínumönnum.

Jón Dagur Þorsteinsson, hægri kantmaður - [5]

Átti í erfiðleikum að komast framhjá Vitaliy Mykolenko, leikmanni Everton. Náði því miður að gera lítið sóknarlega í þessum leik.

Hákon Arnar Haraldsson, (fyrirliði) miðjumaður - [6]

Fín frammistaða hjá fyrirliðanum okkar, en við fengum klárlega ekki að sjá hans bestu hliðar í kvöld.

Ísak Bergmann Jóhannesson, miðjumaður - [6]

Fín frammistaða á miðjunni en tókst ekki að skapa neitt fyrir liðið sóknarlega.

Albert Guðmundsson, vinstri kantmaður - [5]

Sinnti föstum leikatriðum vel en náði ekki alveg að njóta sín á vinstri kantinum í leiknum.

Brynjólfur Andersen Willumsson, framherji - [5]

Fékk fínt tækifæri til þess að skora mark snemma í síðari hálfleik en því miður varið af markverði Úkraínu. Skilaði fínni varnarvinnu og var duglegur að hlaupa en fékk lítið af tækifærum sóknarlega.

Andri Lucas Guðjohnsen, framherji - [5]

Sinnti sínu vel eins og hann hefur gert í síðustu leikjum en lítið að frétta sóknarlega.

Varamenn

Jóhann Berg Guðmundsson kom inn á fyrir Brynjólf Willumsson á 65. mínútu. [5]

Lítið að gerast hjá íslenska liðinu sóknarlega í leiknum. Átti nokkrar fyrirgjafir sem reyndust ekki nógu góðar seint í leiknum þegar það var ennþá tækifæri til þess að jafna.

Daníel Tristan Guðjohnsen kom inn á fyrir Jón Dag Þórsteinsson á 86. mínútu.

Fékk gott færi til þess að jafna leikinn en skotið reyndist ekki nógu gott.

Logi Tómasson kom inn á fyrir Mikael Egil Ellertsson á 86. mínútu.

Spilaði ekki nóg til þess að fá einkunn.