Átta þúsund krónur fyrir miða á úr­slita­leik HM í stað 529 þúsund

Munu þessir útvöldu stuðningsmenn þar með aðeins borga 7600 krónur fyrir miða í staðinn fyrir 529 þúsund krónur.

FIFA tilkynnti á þriðjudag að sextíu dollara miðar yrðu í boði á alla leiki mótsins í Norður-Ameríku og yrðu þeir afhentir knattspyrnusamböndum þeirra þjóða sem keppa. Þessi sambönd ákveða síðan hvernig miðunum verður úthlutað til tryggra stuðningsmanna sem hafa sótt fyrri leiki, bæði á heimavelli og útivelli.

Fjöldi sextíu dollara miða á hvern leik verður líklega nokkur hundruð frekar en þúsundir, í því sem FIFA kallar nú „Supporter Entry Tier“-verðflokk.

FIFA tilgreindi ekki nákvæmlega hvers vegna það breytti stefnu sinni svo harkalega en sagði að lægra verð væri „hannað til að styðja enn frekar við ferðalanga sem fylgja landsliðum sínum á mótinu.“

Heimsmeistaramótið í Norður-Ameríku verður fyrsta mótið með 48 liðum, í stað 32, og er búist við að það skili FIFA að minnsta kosti tíu milljörðum dollara í tekjur eða meira en tólf hundruð milljörðum íslenskra króna. En stuðningsmenn um allan heim brugðust við með áfalli og reiði í síðustu viku þegar þeir sáu miðaáætlanir FIFA sem veittu þátttökuliðum enga miða í lægsta verðflokknum.

Lægstu verðin voru á bilinu 120 til 265 dollarar fyrir riðlakeppnisleiki sem ekki fólu í sér gestgjafaþjóðirnar Bandaríkin, Kanada og Mexíkó. Enska knattspyrnusambandið deildi verðupplýsingum með England Supporters Travel Club (ESTC), sem sýndi að ef stuðningsmaður keypti miða á alla leiki fram að úrslitaleik myndi það kosta rúmlega 7.000 dollara eða meira en 883 þúsund krónur.

Gagnrýni frá stuðningsmönnum, sérstaklega í Evrópu, hafði aukist í nokkra mánuði vegna áætlana um „breytilega verðlagningu“ auk aukagjalda á endursöluvettvangi FIFA, hvort tveggja er algengt í bandarískum skemmtanaiðnaði en ekki meðal knattspyrnuaðdáenda um allan heim.

Stuðningsmannasamtökin Football Supporters Europe (FSE) fögnuðu ákvörðun FIFA á þriðjudag en sögðu að „endurskoðunin gangi ekki nógu langt til að sætta“ og bentu á að verðskipulag fyrir fatlaða stuðningsmenn eða ókeypis fylgdarmiða vantaði.

Í yfirlýsingu var bætt við: „Í augnablikinu lítum við á tilkynningu FIFA sem ekkert annað en friðþægingaraðgerð vegna neikvæðra viðbragða á heimsvísu.“

„Við skorum á FIFA að hefja alvöru viðræður til að finna lausn sem virðir framlag stuðningsmanna og virðingu fatlaðra stuðningsmanna.“

FIFA úthlutar átta prósentum miða til landsambanda fyrir leiki sem lið þeirra tekur þátt í til að selja tryggustu stuðningsmönnunum. Á þriðjudag sagði stjórnin að tíu prósent þeirra yrðu verðlagðir á sextíu dollara.