Syrgir góðan fé­laga í Åge: „Ótrú­lega leiðin­legt að hann sé nú farinn“

Innan við mánuður er síðan að greint var frá því að Hareide hefði greinst með krabba­mein í heila og í gær sagði sonur hans, Bendik, frá því að Åge væri látinn. Hann hefði sofnað svefninum langa um­vafinn sínum nánustu.

Åge átti farsælan feril sem leik­maður sem lands­liðs- og at­vinnu­maður en sem þjálfari átti hann eftir að ná enn eftir­tektar­verðir árangri þar sem að hann vann lands­titla hjá stór­liðum í Noregi, Dan­mörku og Svíþjóð. Þá stýrði hann lands­liði Noregs og kom danska lands­liðinu í tví­gang á stór­mót. Síðasta starf Åge á ferlinum var sem lands­liðsþjálfari Ís­lands og þar hitti hann fyrir Jörund Áka, yfir­mann knatt­spyrnumála hjá KSÍ, sem segir það sorgar­tíðindi að Åge sé nú fallinn frá.

„Åge er stór persónu­leiki sem kom hér inn í smá ólgu­sjó og gerði margt mjög gott. Við bara vottum fjöl­skyldu hans okkar dýpstu samúð,“ segir Jörundur Áki í sam­tali við íþrótta­deild Sýnar.

Jörundur var strax á þeirri skoðun eftir sinn fyrsta fund með Åge á Skír­dag árið 2023 í Osló að hann ætti að verða næsti lands­liðsþjálfari Ís­lands. Åge átti eftir að setja sitt mark á liðið en tók við á krefjandi tíma­punkti, hann fór í vinnu við að endur­nýja hópinn að hluta til og að veita yngri leik­mönnum meiri séns, þar með talið núverandi lands­liðs­fyrir­liðanum Orra Steini Óskars­syni.

Ís­land var nálægt því að komast á Evrópumót undir stjórn Åge en tap í úr­slita­leik um­spils Þjóða­deildarinnar gegn Úkraínu sá til þess að það varð ekki raunin.

„Hann var bara ótrú­lega flottur, auðmjúkur, kraft­mikill, orku­mikill, skap­stór en yndis­leg manneskja. Hann hafði ein­hvern veginn bara allan pakkann. Með gríðar­lega ástríðu fyrir fót­bolta en samt sem áður var hann líka auðmjúkur, mjúkur maður og til­finninga­mikill. Það skipti hann máli að öllum í kringum hann liði vel, hann var fyrst og fremst bara frábær manneskja.“

Jörundur og Åge ræddu oft saman eftir að Norðmaðurinn lét af störfum sem landsliðsþjálfari Íslands. 

„Ótrú­lega leiðin­legt að hann sé nú farinn því Åge hafði hug á því að gera svo margt skemmti­legt núna þegar hann var hættur að þjálfa. Hann var búinn að bjóða okkur í heimsókn, við vorum alltaf á leiðinni til hans en svona er bara lífið. Við höldum áfram. Höldum nafni hans á lofti hér.“

Farið verður nánar yfir feril Åge Hareide í Sport­pakkanum að loknum kvöld­fréttum Sýnar í kvöld og rætt við Jörund Áka sem og fyrr­verandi að­stoðarþjálfara Åge hjá ís­lenska lands­liðinu, Davíð Snorra Jónas­son.