Welbeck skoraði úr einu víti og brenndi af öðru

Jarrod Bowen, fyrirliði West Ham, kom sínum mönnum yfir á 10. mínútu eftir að hafa sloppið í gegnum vörn Brighton.

Danny Welbeck jafnaði úr víti á 32. mínútu og skömmu síðar fengu gestirnir annað víti. Welbeck fór aftur á punktinn en vippaði boltanum í slána.

Í uppbótartíma fyrri hálfleiks fékk West Ham víti eftir að Lewis Dunk handlék boltann innan teigs. Lucas Paquetá tók spyrnuna og skoraði af öryggi.

Markið dugði West Ham þó ekki til sigursins sem liðið þurfti svo mikið á að halda því Joël Veltman jafnaði á 61. mínútu. Lokatölur 2-2.

West Ham er í 18. sæti deildarinnar með fjórtán stig, fjórum stigum frá öruggu sæti. Brighton, sem hefur ekki unnið í fimm leikjum í röð, er í 14. sætinu með 25 stig.

Newcastle fékk sannkallaða draumabyrjun í 1-3 sigri á Burnley á Turf Moor. Joelinton kom gestunum yfir á 2. mínútu og fimm mínútum síðar jók Yoane Wissa muninn í 0-2.

Josh Laurent kom Burnley inn í leikinn með marki á 23. mínútu en nær komust heimamenn ekki. Í uppbótartíma skoraði Bruno Guimaraes svo þriðja mark Newcastle eftir slæm mistök Martin Dúbravka í marki Burnley sem er í nítjánda og næstneðsta sæti deildarinnar með tólf stig. Newcastle er í 10. sætinu með 26 stig.

Everton lyfti sér upp í 8. sæti deildarinnar með 0-2 sigri á Nottingham Forest á City Ground.

James Garner og Thierno Barry skoruðu mörk Everton sem var án margra lykilmanna í kvöld.

Þetta var þriðja tap Forest í röð en liðið er í 17. sæti deildarinnar með átján stig, fjórum stigum frá fallsæti.