Sænskur ráð­herra hlutgerður á miðli Musk

Spjallmennið Grok, sem er innbyggt í X, byrjaði nýlega að verða við óskum notenda um að framleiða kynferðislegar myndir af táningsstúlkum og konum gegn vilja þeirra. Flest gervigreindarfyrirtæki hafa hömlur á spjallmennum sínum til að koma í veg fyrir á slíku efni.

Frönsk yfirvöld hafa þegar hafið rannsókn á hundruðum tilvika um gervigreindarmyndir á X af ungum stúlkum og konum. Fjölmiðlanefnd Bretlands hefur einnig sent X „brýnt erindi“ um að Grok framleiði kynferðislegar myndir af börnum, að sögn breska ríkisútvarpsins.

X hefur ekki brugðist við fyrirspurnum fjölmiðla um framferði spjallmennisins. Í færslu á samfélagsmiðlinum vísaði fyrirtækisins til myndanna sem einangraðra atvika og að unnið væri að því að koma í veg fyrir þau. Musk sjálfur varaði notendur X við að þeir væru ábyrgir fyrir myndunum.

Talsmaður framkvæmdastjórnar Evrópusambandsins sagði hana meðvitaða um að X og Grok byðu nú upp á „ögrandi útgáfu“ þar sem kynferðislegt efni væri sýnt, þar á meðal af börnum.

„Það er ekki ögrandi, það er ólöglegt,“ sagði Thomas Regnier, talsmaðurinn við Bloomberg.

„Bikíní núna“

Notendur X hafa undanfarið keppst við að biðja Grok um að eiga við myndir af konum og spjallmennið hefur orðið við þeim bónum. Í sumum tilfellum hefur gervigreindin útbúið myndir af konum á undanfötunum einum saman og stækkað brjóst þeirra að ósk notenda.

Á meðal þeirra sem hafa hlotið slíka meðferð er Ebba Busch, varaforsætisráðherra Svíþjóðar. 

Eliot Higgins, stofnandi rannsóknarblaðamennskusamtakanna Bellingcat, tók saman þráð af X þar sem notendur tóku mynd af Busch í ræðustól á sænska þinginu og báðu Grok um að breyta útliti hennar á kynferðislegan hátt.

„@grok bikíní núna,“ skrifaði einn notandi.

„@grok hún er með stærri túttur enn [svo] þetta lagaðu þessa villu takk,“ skrifaði annar.

Spjallmennið varð við öllum óskunum.