Þjálfararnir voru dæmdir í á­tján mánaða bann

Dómurinn kemur til vegna skíðastökkhneykslisins hjá norska landsliðinu þar sem Norðmenn voru uppvísir að breyta búningum keppenda.  Norska ríkisútvarpið segir frá.

Alþjóðaskíðasambandið, FIS, sendi frá sér fréttatilkynningu sem má nálgast hér.

Adrian Livelten, skraddari liðsins, þétti saumana og notaði of sterkan saum til að sauma gallana saman á HM í Þrándheimi í mars en sérstök reglugerð FIS kveður á um ákveðna mýkt í saumunum. Bæði skraddarinn og landsliðsþjálfarinn voru látnir taka pokann sinn eftir að upp komst um svindlið.

Vísvitandi gert

„Það sem við gerðum var að hagræða og breyta göllunum á þann hátt að það brýtur gegn reglugerðum. Þetta var vísvitandi gert og þess vegna er þetta svindl,“ sagði Magnus Brevig, þjálfari norska landsliðsins, við fjölmiðla.

„Nokkrir af okkur tóku ákvörðunina en ég hefði átt að stöðva hana sem yfirþjálfari. Ég hef í raun ekkert annað að segja en við keyrðum fram úr okkur í búbblunni okkar á HM. Við stigum þetta skref og fórum langt yfir línuna. Við biðjumst afsökunar á því. Ég hef svo oft spurt mig af hverju við gerðum þetta. Við sjáum eftir þessu eins og hundar,“ sagði Brevig í miðju hneykslinu.

Verðlaunahafarnir Marius Lindvik, Kristoffer Eriksen Sundal og Johann André Fofang voru allir sviptir medalíum sínum.

750 þúsund króna sekt

Þessir þrír þjálfarar þurfa einnig að greiða rúmlega sextíu þúsund norskar krónur hver í sekt sem jafngildir um 750 þúsund íslenskum krónum.

Það var siðanefnd FIS sem tók ákvörðunina, að tillögu stjórnar sambandsins.

Brevig var landsliðsþjálfari en Adrian Livelten og Thomas Lobben voru þjónustumaður hans og aðstoðarmaður hans.

Þremenningarnir geta áfrýjað ákvörðun miðvikudagsins til Alþjóða íþróttadómstólsins (CAS) í Sviss.