Sesselía stýrir Takk og miðlum hjá Högum

Í tilkynningunni segir einnig að undir hið nýstofnaða svið falli annars vegar vildarkerfið Takk og hins vegar rekstrareiningin Hagar Miðlar. Takk sé nýtt vildarkerfi verslana Haga sem bjóði viðskiptavinum meðal annars upp á betri kjör, áhugaverð fríðindi og nýja þjónustu. Hagar Miðlar hafi það hlutverk að nýta fjölbreytta innviði samstæðunnar til að miðla auglýsingum, upplýsingum og fjölbreyttu efni frá þriðja aðila, bæði í verslunum og á stafrænum miðlum.

Fram kemur að Sesselía hafi víðtæka reynslu, hérlendis og erlendis, af rekstri og uppbyggingu nýrra tekjueininga innan fyrirtækja, auk þess að hafa leitt þjónustu-, sölu- og markaðsmál hjá fjölda íslenskra fyrirtækja. Hún starfaði hjá Högum á árunum 2021–2023 sem forstöðumaður nýsköpunar- og markaðsmála, þar sem hún leiddi ýmis umbreytingarverkefni fyrir Haga og verslanir félagsins. Síðast starfaði Sesselía sem framkvæmdastjóri Vodafone fjarskipta hjá Sýn.

„Það er virkilega ánægjulegt að koma aftur til starfa hjá Högum og taka þátt í spennandi vaxtarvegferð félagsins til næstu ára. Það eru afar spennandi verkefni framundan sem hafa það að markmiði að mæta síbreytilegum þörfum viðskiptavina og bæta upplifun með nýtingu á tækni, eitthvað sem ég hef alltaf brunnið fyrir. Á sama tíma er frábært að taka þátt í að byggja upp nýja tekjustrauma í gegnum Haga Miðla,“ segir Sesselía Birgisdóttir.

„Með stofnun sviðs viðskiptavildar, upplifunar og miðlunar erum við að stíga spennandi skref fyrir Haga, annarsvegar tengt því að efla enn frekar þjónustu við viðskiptavini og hins vegar til þess að byggja nýja tekjustrauma. Sesselía þekkir starfsemi Haga vel, hefur mikla reynslu af uppbyggingu nýs rekstrar og ástríðu fyrir því að byggja upp framúrskarandi þjónustustarfsemi. Ég veit að reynsla Sesselíu mun nýtast mjög vel í þeim verkefnum sem eru framundan hjá okkur og það er virkilega ánægjulegt að fá hana aftur í Haga teymið,“ segir Finnur Oddsson, forstjóri Haga.