Bad Bunny hljóp lengra en lið Patriots

Tugir milljóna horfðu á hálfleikssýningu púertóríkanska Grammy-verðlaunahafans sem fór öll fram á spænsku í óþökk Donalds Trump, Bandaríkjaforseta.

Söngvarinn hóf sýninguna með bolta í höndunum og hélt á honum lengi vel á meðan sýningunni stóð. Bandarískar tölfræðiveitur tóku saman að hann hafi alls hlaupið yfir 120 stikur með boltann um völlinn á meðan hann söng.

Bad Bunny hljóp því með boltann 40 stikum lengra en allt lið New England Patriots gerði í leiknum gegn ógnvænlegri vörn Seattle Seahawks sem hreinlega kæfði alla sóknartilburði þeirra fyrrnefndu.

Samtals hlupu leikmenn New England með boltann 79 stikur, Drake Maye fór lengst (37) og hlaupararnir Rhamondre Stevenson og Treyveon Henderson komust 23 og 19 stikur áfram með boltann í leiknum.

Geta má þess að Kenneth Walker III, hlaupari Seahawks, fór með boltann 135 stikur einn síns liðs í leiknum. Hann var valinn maður leiksins.

Seahawks unnu leikinn 29-13 og urðu NFL-meistarar í annað sinn í sögu félagsins.