Undir pressu vegna tengsla við Epstein: „Ég get ekki rekið hann“

Tölvupóstar milli Wasserman og Ghislaine Maxwell frá árinu 2003 voru opinberuð í gögnum frá bandarískum stjórnvöldum sem birt voru örfáum dögum áður en Vetrarólympíuleikarnir í Mílanó og Cortina hófust.

Alþjóðaólympíunefndin, IOC, hefur lítið viljað tjá sig um málið og segir framhald Wasserman í starfi liggja hjá bandarísku skipulagsnefndinni. Nefndin lýsti yfir stuðningi við Wasserman í síðustu viku.

„Það gengur eðlilega á ýmsu í umræðunni en ég get ekki tjáð mig frekar. Þetta augljóslega mál sem liggur á borði stjórnar skipulagsnefndarinnar,“ sagði Mark Adams, talsmaður IOC, á blaðamannafundi í gær.

Karen Bass, borgarstjóri Los Angeles, vill Wasserman á brott. Hún tjáði sig um málið í samtali við CNN.

„Mér finnst hann eigi að segja af sér,“ sagði Bass. „En ég get ekki rekið hann.“

Wasserman hefur verið burðarás í undirbúningi komandi leika frá því að Los Angeles bauðst til að halda leikana árið 2015. Staða hans er aftur á móti völt eftir að nýleg gögn voru birt.

Wasserman rekur umboðsskrifstofu vestanhafs og hefur vegna málsins misst þónokkra skjólstæðinga. Þar á meðal eru poppstjarnan Chappell Roan og fyrrum knattspyrnukonan Abby Wambach.

Wasserman vinnur nú að því að selja téða umboðsskrifstofu.