Viðskipti innlent

Verð­bólga stendur í stað þvert á spár

Árni Sæberg skrifar
Matarverð vegur þungt í verðlagsmælingum.
Matarverð vegur þungt í verðlagsmælingum. Vísir/Vilhelm

Verðbólga mældist 5,2 prósent í febrúar, eftir að hafa einnig mælst 5,2 prósent í janúar.

Greiningardeildir bæði Íslandsbanka og Landsbankans höfðu spáð því að verðbólgan færi strax niður fyrir fimm prósentin og myndi mælast 4,9 prósent í febrúar.

Í tilkynningu þess efnis á vef Hagstofunnar segir að vetrarútsölur séu víða gengnar til baka og verð á fötum og skóm hafi hækkað um 5,1 prósent (áhrif á vísitöluna 0,17 prósent) og verð á húsbúnaði, heimilistækjum hafi hækkað um 5,4 prósent (0,21 prósent). Verð á mat og óáfengum drykkjum hafi hækkað um 0,9 prósent (0,14 prósent), gjöld vegna vatnsveitu, sorphirðu og fráveitu hækkað um 4,3 prósent (0,07 prósent) og flugfargjöld til útlanda um 6,8 prósent (0,15 prósent). Verð á dísel hafi lækkað um 5,6 prósent (-0,05 prósent) og verð á bensíni lækkað um 6,0 prósent (-0,11 prósent). 

„Við sannprófun gagna fyrir febrúar kom í ljós að rangt eldsneytisverð var skráð hjá einum smásöluaðila í janúar. Lækkun á bensíni og dísel í febrúar er að miklu leyti vegna uppfærslu þessarar skráningar. Lækkun á dísel í janúar hefði átt að vera 28,1 prósent (áhrif á vísitölu -0,30 prósent) og lækkun á bensíni hefði átt að vera 31,5 prósent (-0,78 prósent). Leiðréttingin hefur ekki áhrif á birt gildi vísitölu neysluverðs í janúar.“

Síðastliðna tólf mánuði hafi vísitala neysluverðs hækkað um 5,2 prósent og vísitala neysluverðs án húsnæðis um 4,5 prósent.

Skýring Seðlabankans á hvað verðbólga er:

Verðbólga er skilgreind sem viðvarandi hækkun almenns verðlags og er mæld sem tólf mánaða breyting vísitölu neysluverðs. Sú vísitala mælir meðalverð á vörum og þjónustu sem heimili á Íslandi kaupa í hverjum mánuði. Verðbólga felur í sér að verðgildi og kaupmáttur peninga minnkar, þ.e.a.s. minna magn vöru og þjónustu fæst fyrir hverja krónu.

Verðlag


Mest lesið


Fleiri fréttir

Sjá meira


×

Mest lesið