Hanna hæst­á­nægð í Mexíkó að sjá soninn spila

Anton Ari Einarsson stóð í marki Íslands í leiknum og átti nokkrar góðar markvörslur þó heimamenn hafi reynst mun sterkari og unnið 4-0 sigur.

Foreldrar hans ferðuðust í 15 klukkutíma, um 7.300 kílómetra, til þess að sjá leikinn og vonuðust að sjálfsögðu til þess að sjá Anton spila.

Þó að fréttir af óeirðunum í Mexíkó, eftir að herinn skaut glæpaforingja til bana á sunnudaginn, hafi verið áberandi virðast þau Hanna og Einar Þór Magnússon hafa notið sín í Queretaro eins og Hanna útskýrði á reiprennandi spænsku, í klippunni hér að neðan.

Hanna sagði að það væri gott að sjá hve mikil öryggisgæsla væri, þegar þau Einar voru á leið á leikinn í gær. Þau höfðu þá dvalið í fjóra daga í Queretaro og verið hæstánægð með dvölina þrátt fyrir fréttir af óeirðum annars staðar í Mexíkó.

„Allt er svo frábært hérna. Maturinn, fólkið, náttúran. Ég er svo hrifin af öllu hérna,“ sagði Hanna í lauslegri þýðingu blaðamanns.

Eftir að hafa verið á varamannabekk Íslands í leikjunum í undankeppni HM síðasta haust þá spilaði Anton eins og fyrr segir í nótt, sinn þriðja A-landsleik. Þessi 31 árs gamli markvörður Breiðabliks hefur lengi notið stuðnings foreldra sinna í fótboltanum og þá sérstaklega Hönnu, sem er „ekki eins og aðrar mömmur“ eins og Anton orðaði það í viðtali á sínum tíma.

„Mamma er besta kona í heimi og er ekki eins og aðrar mömmur. Hún mætti á báða Evrópuleikina úti, mætti á leikinn á Akureyri og hvar sem við erum að spila á landinu. Hún er alltaf mætt að horfa á strákinn sinn,“ sagði Anton þegar hann var markvörður Vals árið 2017. Óeirðir í Mexíkó breyta greinilega engu þar um.

Hanna sagði sjálf frá því á Facebook að þau Einar hefðu ekki orðið vör við neina óöld í Queretaro.

„Mikið af löggum sjáanlegar reyndar en daglegt líf hér virðist á fullum swing. Við hættum við dagsferð út fyrir borgina til öryggis og erum bara frekar góð,“ skrifaði Hanna á Facebook í vikunni.