Þjóð­verjar ótta­slegnir að missa sleðaíþróttirnar

Til umræðu er að taka baksleða, magasleða og bobbsleða af dagskránni á næstu Vetrarólympíuleikum. Íþróttirnar þykja ekki nógu vinsælar til að svara fyrir kostnaðinn og slæmu umhverfisáhrifin sem þeim fylgja.

Á nýafstöðnum leikum í Mílanó og Cortina vann Þýskaland 19 af 26 verðlaunum sem voru í boði í sleðaíþróttunum, þar af 6 af 8 gullverðlaunum.

„Þetta eru tíðindi sem gera manni ókleift að sofa rólega“ sagði magasleðagoðsögnin Georg Hackl við Sport1 í Þýskalandi þegar leitað var viðbragða.

Vonandi allavega á næstu tveimur Vetrarólympíuleikum

Hann er þó bjartsýnn á að sleðaíþróttirnar verði meðal keppnisgreina á allavega næstu tveimur Vetrarólympíuleikum, því sleðabrautir eru nú þegar til staðar í frönsku Ölpunum og Salt Lake City.

„En eftir það er allt í lausu lofti“ sagði Georg við Sport1.

Ævintýri í anda Cool Runnings á enda? 

Sleðaíþróttirnar segir hann hafa gefið smærri þjóðum tækifæri til að komast á Vetrarólympíuleikana. Sömuleiðis hafi íþróttafólk, sem mistókst í öðrum greinum, getað lagt fyrir sig sleða. Eins og frægt varð í bíómyndinni Cool Runnings.

„Við höfum séð keppendur frá þjóðum eins og Jamaíku, Brasilíu og Ástralíu, þjóðum sem stunda vanalega ekki vetraríþróttir, ná góðum árangri í sleðaíþróttum.“

Georg bætti þá við að ef sleðaíþróttirnar hverfa af Vetrarólympíuleikunum, muni þær líklega hverfa algjörlega.

„Án Ólympíuleikanna verða hlutirnir erfiðir. Við missum mikið fjármagn, samstarfsaðila, sjónvarpsumfjöllun, og þá er þetta í raun bara búið spil.“