Chris Bosh vaknaði í eigin blóð­polli: „Glaður að vera á lífi“

Fyrrverandi körfuboltastjarnan úr NBA-deildinni var að gera sig tilbúinn til að fara á stefnumót með eiginkonu sinni. Á næsta augnabliki vaknaði hann á gólfinu í eigin blóði.

„Ég er glaður að vera á lífi,“ sagði hinn 41 árs gamli Bosh en í myndbandi á samfélagsmiðlum segir hann frá því sem gerðist.

„Þið sjáið að ég er enn að jafna mig,“ sagði Bosh og benti á augun á sér. Hann kallar þetta „brjálæði“ og „ógnvekjandi“ og það gerðist fyrirvaralaust.

Hann hefur einnig skrifað um þetta undir fyrirsögninni „Aftur úr myrkrinu“.

„Ég rankaði hægt og rólega við mér í blóðpolli á meðan eiginkona mín talaði í ofboði við 911. Ég reyndi að hreyfa líkamann eins og ég hafði alltaf gert, en hann brást ekki við. Það var ekkert annað í stöðunni en að gefast upp. Þetta var ógnvekjandi upplifun, eitthvað sem ég hafði aldrei upplifað áður,“ skrifaði Bosh.

„Það var þá sem ég áttaði mig á því: allt getur hrunið á einu augabragði. Það kemur ekki alltaf viðvörun. Það eru ekki alltaf einkenni eða aðdragandi sem segir þér hvað er í vændum. Eina stundina ertu á fótum. Þá næstu gætirðu verið farinn,“ skrifaði Bosh.

Bosh líður betur núna og segir að atvikið – sem hann vill ekki fara nánar út í – hafi gefið honum nýja sýn á lífið.

„Nú hugsa ég um hvernig ég lifi lífi mínu dag frá degi,“ sagði Bosh

Chris Bosh var hluti af sigursælu liði Miami Heat ásamt LeBron James og Dwyane Wade. Þeir unnu NBA-titilinn bæði 2012 og 2013. Hann hefur einnig unnið Ólympíugull með Bandaríkjunum árið 2008.

Bosh þurfti að hætta að spila körfubolta árið 2016 vegna endurtekinna blóðtappa.