Britney Spears hand­tekin og í haldi yfir nótt

Ekki kemur fram í umfjöllun miðla á borð við BBC og AP fréttastofunnar hvers vegna hún var handtekin. Bandaríski slúðurmiðillinn TMZ fullyrðir hinsvegar að hún hafi verið handtekin vegna gruns um að hún hafi ekið undir áhrifum. Þá fullyrðir miðillinn að lögregla hafi fylgt henni á sjúkrahús, en að hún hafi ekki verið mikið slösuð.

Fram kemur í umfjöllun BBC að söngkonan hafi eytt aðgangi sínum að samfélagsmiðlinum Instagram í dag. TMZ hefur eftir Cade Hudson umboðsmanni söngkonunnar að hún iðrist ákaflega vegna handtökunnar í nótt.

„Britney mun taka réttu skrefin og fara að lögum og vonandi verður þetta fyrsta skrefið í átt að löngu tímabærri breytingu sem þarf að verða á lífi Britney. Vonandi fær hún þá hjálp og stuðning sem hún þarf á þessum erfiðu tímum,“ hefur miðillinn eftir umboðsmanninum. Hún segir að Britney muni eyða næstu dögum í faðmi fjölskyldu sinnar.

Ekki þarf að kynna poppstjörnuna sem á marga af stærstu smellum veraldar á borð við Toxic, Baby One More Time og Womanizer. Hún sagði árið 2024 að hún myndi aldrei snúa aftur í tónlistarbransann en síðasta lag sem hún sendi frá sér var dúett með Elton John árið 2022.

Söngkonan var þrettán ár án forræðis yfir sjálfri sér þar sem faðir hennar fór með fjármál hennar og forræði yfir hennar einkalífi. Hún fékk frelsið að nýju árið 2021 og gaf út ævisögu sína árið 2023.