Nem­endur MR af­hentu rektor undirskriftalista

Þetta kemur fram í fréttatilkynningu frá hópi nemenda í Menntaskólanum í Reykjavík (MR). Undarskriftarlistarnir voru annars vegar listi sem gengið hafði manna á milli í MR, með yfirskriftinni „Undirritaðir krefjast þess að latína skuli áfram kennd í 4. bekk málabrautar MR og jafnframt að latínunám verði ekki skert á fornmálabraut skólans.“

Undir hann ritaði hátt á þriðja hundrað manns en síðustu vikur hafa fyrrverandi nemendur MR tjáð sig um þá mögulegu ákvörðun að leggja niður latínukennslu á fyrsta ári, eða í 4. bekk.

Seinni undirskriftarlistinn var af netinu en hann var opinn til undirskriftar dagana 6.–10. mars með yfirheitinu „Björgum latínukennslu í MR“ þar sem mótmælt var fyrirhuguðum breytingum á latínukennslu skólans. Undir hann rituðu 518.

Í tilkynningunni segir að rektor hafi tekið vel á móti nemendunum, átti við þá orðastað og kvaðst mega búast við svari á næstunni. Í samtali við fréttastofu Vísis í febrúar sagði Sólveig „við höfum verið að berjast fyrir fornmálabrautinni og að því að fá nemendur til að skrá sig á þessa braut og að vekja áhuga hjá þeim á að læra fornmál.“

Hún hafði einnig orð á því að allar breytingar á stundatöflu fyrir nýnema næsta árs, skólaárið 26/27, væru miðaðar að því að reyna að laða fleiri nemendur á þessa braut.

Sólveig benti á að þegar framhaldsskólinn var fjögur ár hafi latína aldrei verið kennd á fyrsta ári. Þegar skólinn var svo styttur í þrjú ár hafi það breyst og latína verið kennd öll árin svo að hún yrði ekki skert.

Hún sagði marga nemendur hafa kvartað undan því að fagið sé þungt á fyrsta ári og því hafi þau ákveðið að breyta til. Á næsta ári verði því latína kennd á öðru ári í nýmáladeild og á öðru og þriðja ári í fornmáladeild. Auk þess verði kúrsi bætt við á fyrsta ári sem verður inngangur að tungumálanámi. Þar verði nemendum kennt um ýmis tungumál og þar með talið fornmál.

„Nemendur í skólanum í dag munu ekki finna fyrir neinu. Þetta á bara við um nýnema sem eru að skrá sig í skólann fyrir næsta haust,“ sagði Sólveig í samtali við Vísi.