Fyrsti táningurinn sem skorar fimm­tíu stig í leik í NBA

Flagg átti sjálfur metið sem hann setti í lok janúar. Hann skoraði þá 49 stig í leik gegn Charlotte Hornets. Hann bætti um betur þegar Orlando kom í heimsókn í nótt og skoraði 51 stig.

Flagg er nítján ára og 103 daga gamall og er fyrsti táningurinn í sögu NBA sem skorar fimmtíu stig eða meira í einum og sama leiknum.

Stigin hefðu getað verið fleiri en Flagg var tekinn af velli þegar þrjár og hálf mínúta var eftir af leiknum. Úrslitin voru svo sem ráðin en Orlando vann ellefu stiga sigur, 127-138.

Flagg fór mikinn í 4. leikhluta en þá skoraði hann 24 af 51 stigi sínu. Nýliðinn lék alls í 34 mínútur og hitti úr nítján af þrjátíu skotum sínum, þar af sex af níu fyrir utan þriggja stiga línuna. Þá nýtti Flagg öll sjö vítaskotin sem hann tók í leiknum.

„Það er alltaf gaman að komast í svona ham. Karfan virðist stór. Samherjarnir leita að þér og hjálpa þér. En ég elska að vinna og það var aðalmarkmiðið. Það er erfitt að njóta sín til fulls þegar við erum 10-20 undir stærstan hluta leiksins,“ sagði Flagg eftir leikinn í American Airlines Center.

Flagg er níundi nýliðinn sem skorar fimmtíu stig eða meira í leik í NBA. Hann er ekki í amalegum félagsskap en hinir sem hafa afrekað þetta eru Kareem Abdul-Jabbar, Rick Barry, Elgin Baylor, Wilt Chamberlain, Elvin Hayes, Allen Iverson, George Mikan, Earl Monroe og Brandon Jennings.

Flagg er jafnframt aðeins annar nýliðinn sem nær að skora 45 stig eða meira í leik tvisvar á sama tímabilinu. Hinn er sjálfur Michael Jordan.

Í vetur hefur Flagg skorað 20,8 stig, tekið 6,6 fráköst og gefið 4,5 stoðsendingar að meðaltali í leik. Búist er við að baráttan um að vera valinn nýliði ársins standi milli hans og fyrrverandi samherja hans hjá Duke-háskólanum, Kon Knueppel sem leikur með Charlotte.

Dallas er í 13. sæti Vesturdeildarinnar og á ekki möguleika á að komast í úrslitakeppnina.