Spá Ís­landi á­fram í topp tíu í lands­fram­leiðslu

Þetta kemur fram í umfjöllun EuroNews þar sem tölur Alþjóðagjaldeyrissjóðsins yfir verga landsframleiðslu á mann eru teknar saman og listaðar upp milli landa. Þar kemur fram að verg landsframleiðsla á mann (VLF) sé eitt mest notaða mælitækið til að bera saman hagkerfi. Spár sjóðsins ná til nafnvirði vergrar landsframleiðslu á manns og kaupmáttarjöfnuðs, sem leiðréttir fyrir verðmun milli landa.

Sé einungis tekið mið af vergri landsframleiðslu á mann að nafnvirði helst Ísland í fjórða sæti frá 2025 til 2030 miðað við spár sjóðsins. Þar er Lúxemborg og Írland efst og Sviss í þriðja sæti. Segir í umfjöllun EuroNews að munur á röðun eftir nafnvirði og kaupmáttarjöfnuði segi sína sögu.

Þannig séu Malta, Rúmenía, Pólland og Tyrkland öll mun ofar á lista yfir kaupmáttarjöfnuð en nafnvirði í evrum. Það bendi til þess að raunverulegur kaupmáttur þeirra sé meiri en hráar tölur gefi til kynna.

„Hið gagnstæða á við um Eistland, Bretland, Ísland og Lettland, þar sem röðun eftir kaupmáttarjöfnuði er áberandi lægri en staða þeirra eftir nafnvirði,“ segir í umfjölluninni.  Þar skiptir Ísland á sæti við Möltu, fer úr sjöunda í áttunda sæti og öfugt.

Norðmenn eru sæti á eftir Íslandi í því fimmta miðað við nafnvirði, Danir í því sjötta, Svíar fara úr níunda í áttunda og Finnar haldast í þrettánda. Í röðun eftir kaupmáttarjöfnuði verður Noregur fimm sætum ofar en Ísland árið 2030 í því þriðja líkt og árið 2025. Danir verða einnig í sama sæti, í því fimmta en Svíar fara úr ellefta í tíunda sæti. Finnar fara niður um sæti líkt og Íslendingarað teknu tilliti til kaupmáttarjöfnuðar, fara úr þrettánda sæti í fjórtánda.

Af 41 Evrópulandi, þar á meðal aðildarríkjum ESB, umsóknarríkjum, EFTA-ríkjum og Bretlandi er því spáð að Írland verði í efsta sæti listans yfir verga landsframleiðslu á mann að teknu tilliti til kaupmáttajöfnuðar árið 2030. Landið taki þar með fram úr Lúxemborg sem er í forrystu 2025. Tekið er fram í umfjöllun EuroNews að þeim fregnum beri að taka með fyrirvara þar sem þekkt sé að tölur yfir verga landsframleiðslu Írlands séu skekktar vegna óvenju mikillar viðveru fjölþóðlegra fyrirtækja í landinu.

Mikið bil milli ESB landa og umsóknarríki neðst

Neðstu níu sætin eru að mestu skipuð umsóknarríkjum ESB, þar sem Úkraína, Kósovó og Moldóva reka lestina. Tyrkland er undantekningin á meðal þeirra og er spáð 29. sæti árið 2030. Landið er þar fyrir ofan þrenn ESB ríki, Búlgaríu, Lettland og Grikkland.

Búist er við að fimmtán lönd haldi stöðu sinni á milli áranna 2025 og 2030. Grikkland fellur mest, úr 29. sæti í 32. sæti, en Kýpur hækkar mest, úr 16. sæti í 13. sæti. Því er ekki spáð neitt annað land færi sig meira en þrjú sæti á lista.