Besta deildin á­fram á Sýn Sport

Í tilkynningu segir að Sýn hafi sent út beint frá efstu deildum íslensks fótbolta samfellt í 29 ár og að framlengingin endurspegli þann trausta grunn sem samstarfið hvílir á, sem og einlægan vilja beggja aðila til áframhaldandi samvinnu. Auk beinna útsendinga frá leikjum í efstu deildum karla og kvenna sinnir Sýn Sport ítarlegri dagskrárgerð og vandaðri umfjöllun um íslenskan fótbolta.

„Bestu deildirnar hafa tekið umtalsverðum framförum á undanförnum árum og þróunin heldur áfram af fullum krafti. Áhorfendum á völlum hefur fjölgað jafnt og þétt, staða Íslands á styrkleikalista UEFA hefur styrkst og íslensk lið hafa náð eftirtektarverðum árangri í Evrópukeppnum.

Sýn Sport er leiðandi íþróttamiðill á Íslandi og hvergi er umfjöllun um íslenska knattspyrnu jafn ítarleg og vönduð. Framleiðsla í kringum leiki hefur þróast hratt á síðustu árum og fram undan eru spennandi tímar, ekki síst í ljósi örrar tækniþróunar,“ segir í tilkynningunni.

„Bestu deildirnar skipa veigamikinn sess í dagskrá Sýnar Sports og samningurinn er mikilvægur áfangi í löngu og farsælu samstarfi Sýnar og íslenskrar knattspyrnu. Það er afar ánægjulegt að aðilar hafi skapað sér svigrúm til að móta nýjan langtímasamning, sem verður vonandi til heilla fyrir áskrifendur Sýnar Sports og íslenska knattspyrnu til framtíðar,“ er haft eftir Eiríki Stefáni Ásgeirssyni, íþróttastjóra Sýnar.

Birgir Jóhannsson, framkvæmdastjóri ÍTF, segir að samstarfið hafi verið afar farsællt frá fyrsta degi.

„Aðilar hafa unnið vel saman, ekki síst við skipulag Íslandsmótsins og tímasetningar leikja, sem skiptir sköpum fyrir bæði áhorfendur og félögin. Vörumerkið Besta deildin hefur sömuleiðis vaxið með eftirtektarverðum hætti og umfjöllun Sýnar á þar drjúgan þátt. Markaðstekjur ÍTF hafa einnig aukist ár frá ári og það er ekki síst að þakka því framúrskarandi samstarfi sem við höfum byggt upp við Sýn,“ segir Birgir í tilkynningunni.

Vísir er í eigu Sýnar.