Vann tvo Evróputitla sama vorið

Aston Villa keypti framherjann Guessand síðasta sumar fyrir rúmar 30 milljónir evra frá Nice í Frakklandi. Hann hafði þar skorað tólf mörk í frönsku úrvalsdeildinni og verið valinn leikmaður tímabilsins hjá félaginu.

Hann sló ekki beint í gegn í Birmingham en skoraði þó tvö mörk í Evrópudeildinni, þó hann hafi ekki komist á blað í ensku úrvalsdeildinni. Undir lok janúargluggans færði hann sig til Crystal Palace á láni en tókst ekki heldur að slá í gegn þar.

Hann spilaði sex leiki fyrir Palace í Sambandsdeildinni, þar á meðal í úrslitaleiknum í gær.

Þrátt fyrir að hafa ekki átt sína bestu leiktíð lauk henni sannarlega vel þar sem fílbeinski framherjinn lauk tímabilinu á sögulegan hátt, sem Sambandsdeildarmeistari og Evrópudeildarmeistari.

Hann heldur næst á HM með landsliði Fílabeinsstrandarinnar og vonast eflaust eftir stærra hlutverki en hann hefur fengið hjá sitthvoru ensku liðinu á nýafstaðinni leiktíð.

Fílabeinsströndin er í E-riðli heimsmeistaramótsins með Þýskalandi, Ekvador og Curacao.