ESB sektar Temu um 28,7 milljarða króna

Kjartan Kjartansson skrifar 28. maí 2026 12:35

Kínverska netverslunin Temu hefur notið mikill vinsælda undanfarin ár þrátt fyrir að varningurinn sem þar er seldur sé af mismiklum gæðum. Vísir/EPA

Framkvæmdastjórn Evrópusambandsins lagði tvö hundruð milljóna evra sekt á kínversku netverslunina Temu fyrir að selja ólöglegan varning í Evrópu í dag. Sektin er sú stærsta frá því að lög um stafræna þjónustu tóku gildi í álfunni.

Temu er gefið að sök að hafa ekki metið hættuna á að ólöglegar vörur væru seldar í gegnum vefverslun fyrirtækisins, þar á meðal ónýt raftæki og hættuleg barnaleikföng. Framkvæmdastjórnin telur að Temu geri ill verra með því að halda slíkum vörum að neytendum með meðmælakerfi sínu.

Sektin nemur 28,7 milljörðum íslenskra króna. Fyrri metsekt var sú sem ESB lagði á samfélagsmiðilinn X fyrir ýmis brot á lögum um gagnsæi í desember, að því er segir í frétt Politico af sektinni.

Þrátt fyrir að sektin virðist há er hún langt undir þeim mörkum sem lög ESB um starfræna þjónustu bjóða upp á. Hægt er að gera fyrirtækjum sektir sem nema allt að sex prósentum af árlegri veltu þeirra á heimsvísu.

Framkvæmdastjórnin segist hafa ákvarðað sekt Temu út frá tekjum í fyrra sem voru taldar nema 53 milljörðum evra. Hún hefði þannig getað sektað kínverska fyrirtækið um allt að 2,8 milljarða evra.

Henna Virkkunen, tæknimálastjóri ESB, segir brot Temu mjög alvarleg. Áhættumat á þjónustunni væri fyrsta skrefið fyrir fyrirtæki sem vildu starfa á evrópskum markaði.

Temu hefur þrjá mánuði til þess að bregðast við og bæta úr athugasemdum.

Evrópusambandið Kína