Tottenham bætir í vörnina

Spurs er sagt nálægt því að ganga frá samkomulagi við Marcos Senesi, argentínskan varnarmann Bournemouth, en samningur hans er að renna út á suðurströndinni. Senesi hefur einnig verið orðaður við Barcelona meðal annarra en samkvæmt breskum miðlum er samkomulag um skipti hans til Tottenham gott sem í höfn.

Tottenham sé þá einnig að fá Andrew Robertson frá Liverpool. Robertson hefur verið máttarstólpi í frábæru Liverpool-liði síðasta áratuginn eða svo en hlutverk hans fór minnkandi á nýliðinni leiktíð eftir komu Milos Kerkez frá Bournemouth.

Greint var frá því fyrir þónokkrum vikum að Robertson færi til Tottenham, en þó aðeins ef liðið héldi sér uppi í deildinni. Celtic og Juventus hafa einnig verið orðuð við skoska bakvörðinn en hann er sagður hafa þegar náð samkomulagi við Spurs fyrr í vor.

Robertson er 32 ára gamall vinstri bakvörður og mun leiða Skotland sem fyrirliði á komandi heimsmeistaramóti í Norður-Ameríku.

Senesi er 29 ára gamall miðvörður sem hefur leikið einkar vel í vörn Bournemouth frá komu hans frá Feyenoord árið 2022. Hann missti af sæti í landsliðshópi Argentínu fyrir komandi heimsmeistaramót.