Lög­reglu­menn dulbjuggu sig sem lukkudýr HM fyrir fíkniefnaaðgerð

Í myndbandi sem birt var á opinberum TikTok-reikningi lögreglunnar mátti sjá lögreglumenn klædda sem skallaörninn Clutch og elginn Maple brjóta niður hlið með múrbrjót áður en þeir handtóku mann í hvítum hlýrabol.

Myndbandið sýndi einnig lögreglumenn finna pakka með hvítu dufti og skotvopni og bar yfirskriftina: „HM-gírinn: Aðgerð lýkur með falli „Pichichi“.“

„Þökk sé leyniþjónustustarfi sveitarinnar gátum við komist að því að maðurinn sem við ætluðum að handtaka var harður fótboltaaðdáandi sem lifði og hrærðist í HM-hitanum,“ sagði Carlos Fredy Alcántara Obregón, yfirmaður Grænu sveitar lögreglunnar, við The Associated Press:

„Við ákváðum að láta starfsfólk Grænu sveitarinnar dulbúast sem lukkudýr HM til að nálgast hann án þess að vekja grunsemdir og framkvæma handtökuna,“ sagði Obregón.

Þetta er ekki í fyrsta sinn sem perúska lögreglan klæðist athyglisverðum búningum við handtökur.

Á Valentínusardaginn árið 2025 klæddi lögreglumaður sig upp sem flóðsvín með skjaldbökulaga bakpoka til að framkvæma handtöku í fíkniefnarannsókn í Líma. Aðrir lögreglumenn hafa einnig áður dulbúið sig sem Marvel-ofurhetjur.

Perú komst ekki á heimsmeistaramótið í ár en liðið lenti í níunda sæti af tíu liðum í Suður-Ameríkuriðlinum. Síðast tók liðið þátt í úrslitakeppninni árið 2018.