Fréttir

Skipagöngin sam­þykkt eftir pólitísk hrossa­kaup

Kristján Már Unnarsson skrifar
Norsku skipagöngin verða fyrstu jarðgöng heims fyrir stór skip.
Norsku skipagöngin verða fyrstu jarðgöng heims fyrir stór skip. Kystverket

Skipagöngin við Stað í Noregi verða að veruleika eftir áratuga undirbúning og pólitískar deilur. Þetta varð ljóst eftir að minnihlutastjórn Verkamannaflokksins var niðurlægð með hrossakaupum í norska Stórþinginu við afgreiðslu fjáraukalaga í nýliðinni viku.

Fjármálaráðherrann Jens Stoltenberg hafði síðast í lok maímánaðar sagt skipagöngin vera skýrt dæmi um ábyrgðarlausa meðferð opinberra fjármuna eftir að ríkisstjórn Jónasar Gahr Støre hafði lýst því yfir að jarðgangaverkefnið yrði endanlega slegið af. Minnihlutastjórnin hafði í frumvarpi til fjáraukalaga lagt til að engin framlög yrðu til skipaganga en var auðmýkt þegar niðurstaðan varð sú að samþykkt var 150 milljóna norskra króna fjárveiting, andvirði um tveggja milljarða íslenskra, til að hefja framkvæmdir.

Heimamenn sjá fyrir sér að skipagöngin verði mikið aðdráttarafl fyrir ferðamenn.Kystverket

Norska ríkisútvarpið NRK lýsir atburðarásinni í Stórþinginu sem ævintýralegri á lokaspretti þingstarfanna. Hrossakaupmönnum Miðflokksins, systurflokki Framsóknarflokksins íslenska, hafi með fjörutíu stunda yfirvinnu, þegar komið var fram yfir öll tímamörk, tekist að knésetja forystumenn Verkamannaflokksins og þvinga þá til að fallast á skipagöngin frekar en að verða undir í atkvæðagreiðslu. Við blasti að meirihluti myndi styðja göngin þegar bæði Hægri og Framfaraflokkurinn lögðust á sveif með þeim.

Skipagöngin verða 1,7 kílómetrar að lengd, 36 metrar á breidd og 50 metrar á hæð en þar af verður þriðjungurinn undir sjávarmáli.KYSTVERKET/SNØHETTA, PLOMP

Verkamannaflokkurinn náði svo samkomulagi við fjóra aðra vinstri- og miðjuflokka um lokaafgreiðslu fjáraukalaga og var Íslendingurinn Mímir Kristjánsson, þingmaður Rauðra, í hópi fulltrúa flokkanna sem kynntu niðurstöðuna. Peningarnir verða sóttir í norska olíusjóðinn.

Þetta þýðir að Kystverket, siglingastofnun Noregs, er núna heimilað að undirrita verksamning um skipagöngin upp á 8,6 milljarða norskra króna, andvirði um 113 milljarða íslenskra. Göngin verða 1,7 kílómetra löng í gegnum nesið Stað. Þeim er ætlað að hlífa sjófarendum við að sigla um veðravíti og svæsna röst utan við Stað milli Bergen og Álasunds á vesturströnd Noregs.

Myndband af skipagöngunum var sýnt í fréttum Stöðvar 2 fyrir sex árum þegar þau virtust vera í höfn:

Noregur Skipaflutningar Samgöngumál Sjávarútvegur

Tengdar fréttir

Sakaðir um blekkingar vegna skipaganganna

Norski forsætisráðherrann Jonas Gahr Støre og aðrir ráðherrar minnihlutastjórnar Verkamannaflokksins eru sakaðir um blekkingar í umræðum um skipagöngin við Stað í aðdraganda þingkosninganna í Noregi þann 8. september síðastliðinn. Ásakanirnar koma meðal annars frá formanni nánasta samstarfsflokks Verkamannaflokksins á síðasta kjörtímabili.

Stórþingið niðurlægir Støre og opnar aftur á skipagöng

Norska Stórþingið sló á puttana á forsætisráðherranum Jonas Gahr Støre í fyrradag vegna ákvörðunar hans í síðustu viku um að hætta við gerð skipaganganna við Stað. Í stað þess að göngin umdeildu yrðu endanlega slegin út af borðinu, eins og ríkisstjórnin vildi, náðist meirihluti í þinginu fyrir tillögu sem heldur voninni um göngin á lífi.

Mest lesið


Fleiri fréttir

Sjá meira


×

Mest lesið