Alvotech aflaði 20,6 milljarða í út­boði og á­skriftum

Almennt verð í útboðinu var 3,75 dollarar á hlut. Fjárfestingarbankarnir BofA Securities, Jefferies og Evercore ISI sem sáu um útboðið í Bandaríkjunum nýttu sér kauprétt á viðbótarbréfum á sama gengi og í útboðinu, að því er segir í tilkynningu frá Alvotech.

Heildarafrakstur af bandaríska útboðinu nam 98 milljónum dollara, jafnvirði um 12,2 milljarða króna fyrir afslætti og þóknanir.

Samhliða útboðinu gerði Alvotech áskriftarsamninga við fagfjárfesta á EES-svæðinu um kaup á hlutum á sama gengi. Hlutir fyrir 67 milljónir dollara, jafnvirði um 8,4 milljarða króna, voru seldir þannig.

Alvotech segist ætla að nýta fjármunina sem söfnuðust til þess að fjármagna þróun nýrra hliðstæðna líftæknilyfja, í veltufé og til að standa straum af rekstrarkostnaði.