Tæp­lega 4,6 milljarða tap á rekstri borgarinnar

Helsta frávikið í rekstrarniðurstöðunni er sagt nettó fjármagnsgjöld sem voru rúmum 1,5 milljörðum króna yfir áætlun. Það er rakið til hærri verðbólgu á fyrstu þremur mánuðum ársins en reiknað var með í áætlun, að því er segir í tilkynningu borgarinnar um óendurskoðað rekstraruppgjörið.

Fyrir fjármagnsliði og afskriftir (EBITDA) var niðurstaðan jákvæð um tæpa 2,2 milljarða króna sem var tæpu, 2,8 milljörðum króna betri niðurstaða en á sama árshluta í fyrra. EBIDTA var engu að síður 82 milljónum krónum lægri en lagt var upp með í áætlunum.

Rekstrartekjur jukust um rúma þrjá milljarða króna á milli ára. Skatttekjur ásamt tekjum frá Jöfnunarsjóði jukust um rúman 3,1 milljarða króna. Þar af jókst staðgreiðsla útsvars um rúma 2,8 milljarða. Þá voru framlög frá Jöfnunarsjóði 810 milljónum króna hærri en á fyrsta ársfjórðungi 2025. 

Sala byggingarréttar var 114 milljónum króna lægri í ár en á sama tímabili árið 2025 en söluhagnaður eigna var rúmum hálfum milljarði hærri.

Launakostnaður borgarinnar hækkaði um hátt í 1,2 milljarða króna sem er einkum rakið til launahækkana samkvæmt kjarasamningum. Gjaldfærsla lífeyrisskuldbinding var tæpum 2,2 milljörðum krónum lægri en á sama tímabili 2025 en gjaldfærsla tímabilsins tekur mið af áætlun. Á sama tíma í fyrra var gjaldfærsla lífeyrisskuldbindinga aukin um 2,5 milljarða vegna nýrra kjarasamninga á tímabilinu. 

Annar rekstrarkostnaður jókst um tæpa 1,3 milljarða króna á milli ára og afskriftir um 161 milljónir. 

Nettó fjármagnsgjöld voru hátt í 1,8 milljörðum krónum hærri í ár en í fyrra sem er einkum sagt mega rekja til hærri verðbólgu á tímabilinu. Veltufé frá rekstri var jákvætt um 622 milljónir króna og veltufé frá rekstri í hlutfalli af tekjum var jákvætt um 1,2% á fyrsta ársfjórðungi 2026.