Sport

Bara einn í flug­vélinni heim af HM

Óskar Ófeigur Jónsson skrifar
Brasilíumaðurinn Danilo Luiz da Silva eftir tapleikinn á móti Norðmönnum um síðustu helgi. Hann var sá eini í liðinu sem skilaði sér strax heim til Brasilíu.
Brasilíumaðurinn Danilo Luiz da Silva eftir tapleikinn á móti Norðmönnum um síðustu helgi. Hann var sá eini í liðinu sem skilaði sér strax heim til Brasilíu. Getty/Tom Weller/

Brasilíumenn eru úr leik á HM eftir tap á móti Norðmönnum í sextán liða úrslitunum og það var ekki mikill áhugi hjá leikmönnum liðsins að fljúga aftur heim til Brasilíu.

Flugvél brasilíska knattspyrnusambandsins flaug heim eftir tapið gegn Noregi. Það er óhætt að segja að varnarmaðurinn Danilo Luiz da Silva hafi haft nægt fótapláss. Hann var nefnilega eini brasilíski landsliðsleikmaðurinn um borð í vélinni.

Í gær, þriðjudag, lenti flugvél brasilíska knattspyrnusambandsins í Rio de Janeiro. Hún flaug frá New Jersey eftir að Brasilía féll úr leik gegn Noregi í 16-liða úrslitum nokkrum dögum áður.

Farangurinn var léttur. Eini leikmaðurinn í hópi Carlo Ancelotti sem tók sér sæti var hinn 34 ára gamli Danilo, að því er brasilíski vefmiðillinn Metrópoles greinir frá.

Fyrrverandi varnarmaður Real Madrid, Juventus og Manchester City fékk þó smá félagsskap. Hluti af starfsliðinu, læknateyminu og sjúkraliðum fór einnig um borð.

Brasilíski hópurinn valdi aðrar ferðaleiðir eftir að liðið féll úr leik á HM.

Carlo Ancelotti er sagður hafa ferðast beint frá New Jersey til Vancouver í Kanada. Ítalski þjálfarinn er kvæntur kanadískri konu og á parið hús í Vancouver.

Hinir leikmennirnir eru sagðir hafa farið beint í frí. Neymar er sagður hafa farið með fjölskyldu sinni til Orlando, Endrick hefur sést í New Jersey og Vinicius Junior flaug til Ibiza, samkvæmt The Sun.

Neymar skoraði eina mark Brasilíu í 1–2 tapinu gegn Noregi.

HM 2026 í fótbolta Brasilía

Mest lesið


Fleiri fréttir

Sjá meira


×

Mest lesið