Stelpurnar skelltu Svíum og til­heyra á­fram elítunni

Ísland skellti Svíþjóð á mótinu í Litháen í dag, 86-61, og spilar því um sæti 9-12, eftir að hafa tapað gegn Tyrklandi í 16-liða úrslitunum í gær.

Þrettán efstu liðin halda kyrru fyrir í A-deildinni og hefur Ísland þar með, eftir að hafa fyrst leikið í A-deildinni fyrir tveimur árum og þá einnig haldið sæti sínu, tryggt sér sæti áfram í A-deildinni á næsta ári.

Rebekka Rut Steingrímsdóttir var aftur stigahæst fyrir Ísland í dag, með 24 stig, auk þess sem hún tók sex fráköst og gaf fimm stoðsendingar. Sara Björk Logadóttir skoraði 18 stig og Berglind Katla Hlynsdóttir skoraði 15 stig, en nánari tölfræði má finna hér.

Nú er ljóst að Ísland mun mæta Þýskalandi á morgun og úrslit leiksins ráða því hvort Ísland spilar svo um 9. eða 11. sæti á sunnudaginn, á lokadegi mótsins.