Afríska knattspyrnusambandið styður Infantino ein­róma

Patrice Motsepe, forseti CAF, fagnar yfirlýsingu FIFA eftir neyðarfund á miðvikudag, bæði stuðningsyfirlýsingu stjórnarinnar við Infantino og afsökunarbeiðni vegna mistaka sem gerð voru í ferlinu í kringum áform um að selja hlut í mótum sambandsins til utanaðkomandi fjárfesta. Áformin hafa verið lögð á hilluna eftir hörð viðbrögð.

Evrópska knattspyrnusambandið hefur gert það ljóst að Infantino njóti ekki lengur trausts og telur UEFA að hann verði að segja af sér. CAF hefur komist að gagnstæðri niðurstöðu.

„Stjórn CAF ítrekaði einróma stuðning sinn við Infantino, forseta FIFA, og þakkaði honum fyrir stuðning hans við afríska knattspyrnu í gegnum árin. Infantino, aðalritarinn Mattias Grafström og stjórn FIFA fengu einnig þakkir fyrir að hafa skipulagt mjög vel heppnað heimsmeistaramót,“ segir í yfirlýsingunni.