Aftur í skólastjórastólinn

Frá þessu greinir Valdimar í færslu á Facebook-síðu skólans. Hann segist koma til starfa fullur tilhlökkunar og sé strax farinn að finna fyrir þeim góða anda sem ríki í skólanum. 

„Ég hlakka til að sjá ykkur á mánudaginn, hitta ykkur og börnin ykkar og hefja nýtt og spennandi skólaár í Húsaskóla,“ segir Valdimar. 

Hann hafi starfað í grunnskólum í rúm tuttugu ár og viti hversu mikilvæg góð samskipti séu. 

„Ég legg mikla áherslu á opið og gott samtal og að foreldrar finni að dyr skólans standi þeim ávallt opnar. Gott samstarf heimilis og skóla er einn af hornsteinum farsællar skólagöngu barna okkar. Við erum nefnilega öll í sama liðinu og höfum sama markmið en það er að börnunum okkar líði vel, þau finni til öryggis og fái tækifæri til að vaxa og dafna,“ segir Valdimar. 

Stóð til að endurnýja samstarfið 

Valdimar lét af störfum sem bæjarstjóri fyrr á þessu ári eftir sveitarstjórnarkosningarnar síðustu. Fyrst um sinn stóð til að endurnýja samstarf Sjálf­stæðis­flokksins og Framsóknar­flokksins sem mynduðu meiri­hluta á síðustu tveimur kjörtíma­bilum en þær viðræður fóru fljótt um þúfur og var Valdimar sakaður um trúnaðarbrest.

Bæjarstjórinn fyrrverandi var skólastjóri Öldutúnsskóla í um sextán ár eða frá árinu 2008 fram til ársins 2024 og tók við starfi bæjarstjóra Hafnarfjarðar áramótin um 2025. Hann tók við af Rósu Guðbjartsdóttur í samræmi við samkomulag Sjálfstæðisflokks og Framsóknarflokks eftir sveitarstjórnarkosningarnar árið 2022 um að oddviti Sjálfstæðisflokks myndi sitja í stóli bæjarstjóra til 1. janúar 2025 þegar oddviti Framsóknarflokks myndi taka við.

Sjá einnig: Valdimar kveður sáttur en segir síðustu daga krefjandi