Björguðu veikum göngumanni í kíló­metrahæð á Fimm­vörðu­hálsi

Þetta kemur fram í tilkynningu frá Landsbjörgu.

„Upp úr klukkan hálf sex í eftirmiðdaginn í gær, föstudag, barst Neyðarlínu aðstoðarbeiðni frá sönghópi sem var á leið yfir Fimmvörðuháls, vegna skyndilegra veikinda eins úr hópnum. Staðsetning hópsins og eðli veikindanna voru þess eðlis að björgunarsveitir voru kallaðar út á mesta forgangi og fyrsta viðbragð keyrði austur að Skógum í forgangsakstri. Einnig var þyrluáhöfn boðuð út,“ segir í tilkynningunni.

Þar kemur fram að talsverð þoka hafi verið á hálsinum, lágskýjað og lítið skyggni.

„Ljóst var að erfitt gæti reynst fyrir þyrlu að komast að vettvangnum.“

Þá varð ljóst þegar fyrstu hópar björgunarfólks komu á staðinn að vettvangur var í brattri brekku, skammt austur af Fimmvörðuskála, í ríflega þúsund metra hæð.

Boðaðar voru út björgunarsveitir víða af Suðurlandi, frá Vík í austri að Árborgarsvæðinu sem og Vestmannaeyjum, en þaðan flutti björgunarskipið Þór fjallabjörgunarmenn sem voru svo sóttir af björgunarsveitinni Dagrenningu á Hvolsvelli í Landeyjahöfn.

Fyrstu hópar voru komnir á vettvang rétt um sjöleytið í gærkvöldi. Þá mun líðan sjúklings hafa verið nokkuð stöðug en sjúkraflutningamenn frá HSU sem fóru á staðinn með björgunarsveitum hófu þegar að hlúa að viðkomandi.

„Þarna var ljóst að þyrla kæmi ekki að notum, en henni var þá lent á flugvellinum á Skógum og beið þar átekta ef flytja þyrfti sjúkling með hraði. Björgunarmenn hófust handa við að koma fyrir tryggingum og línum til að flytja sjúkling niður bratta brekkuna að þeim stað sem bílar og björgunartæki önnur komust, en um talsvert brattlendi er að fara sem og ís og snjó sem tekur ekki upp á þessum slóðum.“

Í tilkynningunni segir að um klukkustund síðar hafi verið búið að koma sjúklingnum niður brekkuna og í björgunarsveitarbíl sem svo flutti hann niður af hálsinum og að sjúkrabíl. Þá var ástand hans metið þannig að ekki væri þörf á flutningi með þyrlu, sem flaug þá aftur til Reykjavíkur.

„Ásamt sjúklingi voru nokkrir samferðamenn hans og aðstandendur fluttir niður, sem og ferðamaður sem hafði orðið eftir í Baldvinsskála þegar hópur hans, þessum hóp ótengdur, var á göngu yfir hálsinn. Sá kenndi einhverra eymsla í baki og treysti sér ekki til að halda áfram för en hafði ákveðið að gista í Baldvinsskála og meta stöðuna að morgni.“

Alls tóku rétt um sextíu manns þátt í aðgerðinni sem var að mestu lokið um klukkan tíu í gærkvöldi.

Fréttin hefur verið uppfærð. Í upprunalegri útgáfu sagði að um sönghóp hafi verið að ræða, en svo var ekki.