Innlent

Límmiðar lifðu ekki af nóttina

Jón Þór Stefánsson skrifar
Til vinstri má sjá rúlluna eins og hún var í gær. Og til hægri eins og hún blasti við í morgun.
Til vinstri má sjá rúlluna eins og hún var í gær. Og til hægri eins og hún blasti við í morgun.

„Ég er bara algjörlega miður mín út af þessu. Að þetta fái ekki að vera í friði. Þetta eru líklega einhver skemmd epli,“ segir Frosti Sigurgeirsson, bóndi á Heiðarseli á Hróarstungu í Fljótsdalshéraði, sem setti upp límmiða á heyrúllur í gær, merkta „Já til að sjá“. Miðarnir voru horfnir í morgun.

„Þetta er inni á landareign minni. Fólk má gera það sem það vill í sínum garði, er það ekki?“ segir Frosti.

„Ég veit náttúrulega ekki hvers vegna þetta var gert, en þetta er voða leiðinlegt. Þetta er afleiðing neikvæðarar umræðu um bændur. Bændasamtökin hafa verið með einsleitan áróður, en bændur eru auðvitað ekki allir á sama stað með þetta, ekkert frekar en smiðir, rafvirkjar eða sjómenn.“

Þetta er ekki í fyrsta skipti sem verk sem þetta er unnið í kosningabaráttunni. Greint var frá því á Mbl.is á dögunum að límmiði, merktur „ESB, nei takk“ hafi verið tekinn af, og í staðinn krotað „Já til að sjá“.

„Ég hef heyrt um þetta hjá báðum hópum, að það sé jafnvel verið að skemma rúllur líka. Maður nefnilega skemmir rúlluna ef maður sker gat á plastið. Fólk verður að geta lýst skoðun sinni án þess að eiga von á einhverju svona. Manni finnst þetta svolítið lágkúrulegt, hvorum megin sem það er.“

Hann hvetur áhrifafólk í umræðunni til að stilla henni í hóf.

„Það á ekki að æsa fólk upp í einhverja vitleysu.“

Frosti ætlar ekki að láta þetta stoppa sig og hyggst hengja upp önnur eins skilaboð.

„Ég mun halda baráttunni áfram að minni sannfæringu.“

Múlaþing Þjóðar­at­kvæða­greiðsla um ESB-viðræður Landbúnaður

Mest lesið


Fleiri fréttir

Sjá meira


×

Mest lesið