Mein­leg villa á maraþonmedalíu

„Við ætlum ekki að hlaupast undan ábyrgð,“ segja skipuleggjendurnir í léttum tón eftir mistökin.

Þau felast í því að rangt mannvirki var grafið í medalíuna sem annars er öll hin glæsilegasta. Á henni má sjá þekkt mannvirki á borð við óperuhúsið og hafnarbrúna í Sydney. Jafnframt stóð til að hafa Allianz-fótboltaleikvanginn í Sydney á medalíunni en hönnuðurinn setti í staðinn mynd af Allianz-leikvanginum í München í Þýskalandi.

Skipuleggjendur viðurkenna að þetta séu „óheppileg mistök“ og segja við BBC að það sé „aðeins of alþjóðlegur blær yfir bakhlið þátttökumedalíunnar, þar sem mynd af röngum leikvangi var notuð.“

Um það bil 40.000 hlauparar verða með í Sydney-maraþoninu á sunnudaginn og fá þar með medalíuna um hálsinn að hlaupi loknu.

„Þetta er falleg medalía og núna er hún orðin enn sérstakari. Þetta hefur alla vega orðið til þess að allir hafa um eitthvað að ræða um helgina, aðallega í léttum tón,“ segja skipuleggjendur.