Verð­bólga eykst: For­sendur kjara­samninga brostnar

Hagstofan birti niðurstöður verðmælinga ágústmánaðar á vef sínum klukkan 09. Þar segir að vísitala neysluverðs, miðuð við verðlag í ágúst 2026, sé 694,6 stig og hækki um 0,20 prósent frá fyrri mánuði. Vísitala neysluverðs án húsnæðis sé 553,8 stig og lækki um 0,02 prósent frá júlí 2026.

Flugfargjöld lækkuðu um tæp tíu prósent

Fataútsölur séu víða gengnar til baka og verð á fötum hafi hækkað um 4,1 prósent (áhrif á vísitöluna 0,10 prósent). Reiknuð húsaleiga hafi hækkað um 0,9 prósent (áhrif 0,18 prósent) og flugfargjöld til útlanda hafi lækkað um 9,6 prósent ( áhrif -0,34 prósent).

Gjöld í háskóla hafi hækkað um 15,1 prósent (áhrif á vísitöluna 0,07 prósent) en sú hækkun sé að mestu leyti tilkomin vegna hækkunar skráningargjalds í opinberum háskólum úr 75.000 krónum í 100.000 krónum. Það gjald hafi síðast hækkað fyrir 12 árum.

Síðastliðna tólf mánuði hafi vísitala neysluverðs hækkað um 5,6 prósent og vísitala neysluverðs án húsnæðis um 5,2 prósent.

Íslandsbanki sannspár

Lengi hefur legið í loftinu að verðbólga myndi mælast yfir 4,7 prósenta viðmiði kjarasamninga en hagfræðingar Íslandsbanka spáðu því nýverið að verðbólga myndi mælast 5,6 prósent.

Kollegar þeirra í Landsbankanum voru ívið bjartsýnni og spáðu 5,5 prósenta verðbólgu.